1352/2024-2025

Aizawl dated 29th July 2024: Vawiin chawhnu dar 1:00 khan Hyve Aizawl City Hall-ah Women & Child Development (WCD) hnuaia scheme pahnih, Mission Vatsalya leh Mission Shakti-te kaltlangin May ni 28, 2024-a Cyclone Remal vanga Mizoram hmun hrang hranga vanduaina leh harsatna tawk zinga naupangte hnena chhawmdawlna hlanna hun 'Remal's Child Victum's Compensation Programme' hman a ni a. Pi Lalrinpuii, Minister, Social Welfare, Tribal Affairs, Women & Child Development Department chu khuallian niin Cyclone Remal tuartu naupangte hnenah chhawmdawlna thilpek a hlan.

Minister Pi Lalrinpuii chuan Cyclone Remal avanga mi tam takin an in leh lo mai bakah nunna hial an chan leh chhungkaw thenkhatte Relief Camp-a an awm a ngaih phah chu pawi a tih thu sawiin, khuarel chhiatna tuartu naupangte chu 'The Juvenile Justice (Care and Protection of Children) Act, 2015 chuan a bika enkawl leh venhim ngai (Children in need of care and Protection) a tihte zing ami an nih avangin ngaihpawimawh an ni, a ti. Sawrkar atanga tanpuina awm ang angte hmanga tuamhlawm an nih tur thu leh heng tanpuinate hi tangkai tak leh hmasawn nana hmang tur leh chhelna leh beiseina nen hma hun thlir tlat turin a chah a. Khuarel chhiatna tuartu naupangte chhawmdawl leh tanpui chu sawrkarin a ngaih pawimawh thu Minister chuan sawiin, thlipui Remal avanga chhawmdawl ngai naupang chhinchhiah 96 an awm mek thu a sawi a. Women & Child Development hmalaknain a tum khatna atan naupang 41-in tanpuina an dawng chu lawmawm a tih thu a sawi bawk.

Pi Lalrinpuii chuan chhawmdawlna pekte chu zirchianna leh finfiahna atanga teha chhawmdawlna mamawh hmasa zual ngawih ngawiha ngaihte an ni tih sawiin, chhawmdawlna la dawng ve lo te pawhin an la dawn zel theih nan kawng hrang hrang dapin theihtawp chhuaha hma lak zel tum a ni, a ti a. Hrisel taka naupang an than len theih nan chhungkua leh khawtlangah boruak zalen, him leh muanawm siam a pawimawh thu sawiin, inrikrapna leh hleilenna chuan a chhe zawngin naupang rilru nasa takin a nghawng theih thu a sawi a. Naupangte seilenna inchhungkhur him leh hlim siam tura hma la theuh turin nu leh pa kalkhawmte pawh a chah nghal bawk a ni.

He hun hi Pi Zoramthangi Chhangte, Director, WCD chuan kaihruaiin kalkhawmte lawmna thu a sawi a. Pi Amy Lalrinpuii, Principal Programme Manager, Mizoram State Child Protection Society chuan 'Cyclone Remal's Child Victim Compensation Program' kaltlanga naupang chhawmdawl leh tanpuina kalpui a nih dan a tarlang a. Chhawmdawlna dawngtu naupang chhungte atangin thusawi ngaihthlak a ni bawk.

District Child Protection Unit, Aizawl leh Child Welfare Committee, Aizawlte chuan May ni 31, 2024 atanga July ni 5, 2024 chhung khan Aizawl leh a chhehvel hmun hrang hranga Cyclone Remal-in chhiatna a thlen tuartu naupangte zirchiangin finfiahna hun an nei a, he chhiatna thlengin a nghawng zingah hian naupang 96 lai an tel a ni. He chhawmdawlna programme-ah hian Mission Shakti hnuaia Beti Bachao, Beti Padhao (BBBP) atangin hmeichhe naupang 28 te SSA Account hawn sak an ni a. Naupangte'n ei leh in tur tha an neihna turte, an lehkha zirna puitu tur leh hriselna tha an neih theihna atana an inenkawlna turin Mission Vatsalya hnuaiah Juvenile Justice Fund atangin naupang 16 te kum khat chhung atan thla tin Rs. 2,000/- theuhin sum leh paia chhawmdawlna (Sponsorship) pek an ni a. Heng bakah hian naupangte hi gift package pek niin, mi inphalte'n stationery item-te an pe bawk a ni.

Vawiin hun hmannaah hian Directorate of Women & Child Development leh Aizawl Head Post Office-a thawktute an tel a ni.