2067/2025-2026

Saitual, the 27th October, 2025: Vawiin khan DC Conference Room, Saitualah Pu Lallawmawma, Addl DC kaihhruainain Saitual District-a Indo-Myanmar Border hungna (entry/exit point) panna tur kawng siam chungchangah Saitual District Border Coordination Committee an thu khawm.

He hunah hian Pu Lallawmawma, Addl DC chuan thu a sawi a, kawng siam chungchangah Hrianghmun khaw mipuite hmasawnna tur chu an duh ber a nih rualin kawng siam tur chuan kalphung mumal tak zawm a ngai thin, a ti a, mipuite duh dan ang veka kal a rem loh chang a awm thin a ni, a ti. Addl DC chuan Indo-Myanmar Border hungna (entry/exit point) panna tur kawng, Hrianghmun-Tuisa river approach road chu ei leh bar atana inkalpawhna kawng (economic road) a ni lo tih hriat a tul a ni, a ti a, ram ven himna tur kawng (defense road) atana hman a nih dawn avangin mipui chenna hnaiha siam a rem lo tih chu Hrianghmun mipuite pawhin an hriatthiam hram hram a tul a ni, a ti.

Vawiin thutkhawmah hian Hrianghmun-Tuisa lui kawng siam tur chungchanga harsatna awm te sawiho a ni a, Hrianghmun khawtlangin kawng pahnih an chhawp chhuah te chu Border Roads Organisation te chuan a hmunah enfiahin ground survey an nei a. Heng kawngte hi a awihin, a leilung a nghet lo a, min mai thei dinhmuna a din avang te, Indian Roads Congress (IRC) standard a phak kim loh avang te leh kawng awm sa bakah mipui chenna a hnaih vangtein BRO lam chuan kawng dang an chhawp chhuak (propose) leh ta a ni.

Vawiin thutkhawm hi Pu Lallawmawma, Addl. DC chuan a kai hruai a, Pi Dorothy Muansangi, Border Coordination Committee Sub-committee chairman & SDO (C), Pu Tharun Patnaik Madala, SDO (S), Pu Lalthakima Chhangte, Settlement Officer, Pu J. Rokima, Addl SP, Pi F. Zodingpuii, DIPRO, Hrianghmun YMA leh Village Council president te leh 34 Assam Rifle leh BRO aiawhte an tel a ni.