4822/2025-2026

Saitual, the 13th March, 2026: Zofate kut ropui leh ngaihhlut hlawh ber te zinga mi Chapchar Kut 2026 chu Mizoram hmun dang te rualin Saitual Public Playground, Saitualah ropui taka lawm a ni a. Pu B. Lalchhanzova, Hon’ble Minister, Revenue, FCS&CA, IPR&PS, chu Kut Pa niin, District Bawrhsap Pu Srinivas Sadi chu Kut thlengtu a ni.

He hunah hian Kut Pa Pu B. Lalchhanzova chuan Zofate tana Kut pawimawh Chapchar Kut hmang tura kalkhawm zawng zawngte kut chibai a buk a, DC office lam te leh Saitual mipuiten tha taka an lo dawnsawn avangin lawmthu a sawi nghal a ni. Minister chuan kumin Chapchar Kut thupui atana thlan “Zonun ze mawi- Inremna” tih chu a pawimawh hle a ni, a ti a, inremna tel lo chuan khawtlang a kal thei lo a ni, a ti.

Pu B. Lalchhanzova chuan inremna awm tur chuan chhungkuaah bul tan a ngai tih a sawi a, chhungkua mai bakah thenawm khaw vengte, khawtlanga kan chenpuite, dan leh hrai kengkawhtute, sawrkar lam te leh NGO hrang hrang te nena inrem a, an thu te kan zawm thin a tul tih a sawi bawk. Kut Pa chuan hnam dangten sawrkar hna pawimawh an chelh chhoh mek zel tih sawiin, tha taka thawkho tur chuan hnam hrang hrang te nen pawha inremna tha neih a pawimawh a ni, a ti.

Minister chuan Mizo hnam chu hnam ropui a ni sa tih a sawi a, kan pi leh pu te tlawmngaihna, inremna, inunauna leh hawihhawmna te chu chhawm nung zel turin kalkhawmte chu a chah a ni. Chapchar Kut hlawhtling taka lawm a nih theih nana Saitual District mipui tha leh zung sengtu zawng zawngte chungah lawmthu sawiin, hlim taka Chapchar Kut hmang turin kalkhawmte chu a duhsakna a hlan bawk a ni.

Kut Thlengtu, District Bawrhsap Pu Srinivas Sadi chuan inlawmna thu sawiin, Saitual District-a Chapchar Kut hmang tura lo kal zawng zawng te leh Kut inbuatsaihnaa tha thawhtu zawng zawng te chungah lawmthu a sawi a. Bawrhsap chuan Kut thupui “ Zonun ze mawi- Inremna” tih chu hre reng a, tlawmngaihna leh hawihhawmna nunpui chhunzawm a, hlim taka Kut hmang turin kalkhawmte chu a sawm a ni.

Vawiin Kut hmannaah hian Saitual Town YMA Branch hrang hrang te leh YMA Sub-Hqrs Cultural Troop te atangin Cheraw Kanpui entir a ni a, Sub- Hrqs YMA Cultural Troop, YMA Saitual Town Branch leh cultural club dang ten Mizo hnam lam chi hrang hrang- Cheraw, Khuallam, Chheih lam leh Sarlamkai lam an entir a. MHIP Sub. Hqrs atangin Siktuithiang lam entir niin, YMA chhang te an pawnto bawk a ni. MUP Saitual District te chuan hlado an chham a, Govt. Saitual College atangin Mizo hnam thuam hrang hrang entirna kawngzawh “Costume Parade” neih niin, zai rimawi ngaihnawm tak tak te ngaihthlak a ni bawk.

Chapchar Kut 2026 lawmna huna kalte atangin Chapchar Kut Lanu atan Zaihmingthangi, Pawlrang chu thlan niin, Kut val atan Martin Lalruatfela, Keifang Venghlun chu thlan a ni bawk. Naupang kum 12 hnuai lam atangin Kut hraite thlan an ni a, hmeichhe naupang zingah Naom Zomuanpuii, Saitual Venglai chu thlan niin, mipa naupang zingah Reuben Malsawmzuala, Saitual Chhim Veng chu thlan a ni.