4821/2025-2026

Dated Kolasib the 13th March 2026: Tukin khan Kolasib Sports Stadium ah Kolasiba Chapchar Kut 2026 lawmna chu ropui taka hman a ni a. He hunah hian Pu Lalfamkima Deputy Speaker, Mizoram Legislative Assembly chu Kut Pa niin, Pu Robert C Lalhmangaiha, Kolasib Bawrhsap chu Kut thlengtu a ni.

Kut Pa, Pu Lalfamkima chuan mipui kalkhawmte hnenah Chapchar Kut chibai bukin, he kut hi Mizo te zinga kut ropui ber a nih thu a sawi a. Chapchar Kut tobul tarlangin, kum 1400 AD vel khan Seipui khua atanga hman tan a nih thu a sawi . Kumin Chapchar Kut thupui, 'Zonun Zemawi - Inremna' tih chu thupui tha tak a nih thu sawiin, "Kan inremna leh tlawmngaihna hian hnam angin min ti phuisui a, khawhar chhungte tan pawh thlamuanna thlentu a ni. Pachhia leh thawkmawh zawkte kan inpuihbawm tawnna te hi Zonun zemawi dik tak chu a ni," a ti.

Kut Pa chuan Kan thlahtute nuna inlungrualna awm thinte tarlangin, "Kan pi leh pute kha chu a thlum a al ei za, inlungrual taka khawsa thin an ni a. Tunlaiah erawh chhungkaw ro inchuh vanga thih ngam khawpa innghirnghona te kan zingah a tam ta hi a pawi hle a ni. Hnam inpumkhatna aia politics-ah te inchirhthehna a hluar ta lutuk te hi siamthat kan ngai a ni," tiin mipuite a chah.

Zonun zemawi chhawm nung a, vawng nung zel turin kalkhawmte a chah a. Kumin Chapchar Kut thupui hian Mizo mipuite zingah inremna, tlawmngaihna leh inhmangaih tawnna rawn thlen thar leh se tiin duhsakna a hlan a ni. Zoram mipuite chu inpumkhat tura mawhphurhna lian tak kan nei tih hriain, mimal leh chhungkuaah pawh Lal Isua Krista hnungzuiin inrem taka awm ho turin a chah bawk.

Vawiin Kolasiba Chapchar kut hmanna ah hian Mizo hnam lam chi hrang hrang; Cheraw kan, Par lam, Sarlamkai, Chheih lam leh Tlanglam te entir a ni a. Hnam lam bakah hian zai mawi tak tak MZI Kolasib member te leh Bzi Tochhawng leh Vanlalhlana te atangin ngaihthlak a ni bawk. Heng bakah hian MUP in Hlado chham na hun an hmang bawk a ni.

Kolasiba Chapchar kut 2026 hmanna hunah hian mipui thahnem tak an kalkhawm a. Amaherawhchu chawhnu herah ruah nasa taka a sur avangin Chapchar Kut lawmna hun hi Pu Robert C Lalhmangaiha, Kolasib Bawrhsap chuan a khar a ni.