4082/2024-2025

Saitual, the 4th February, 2025 :  Vawiin chawhma dar 11:00 khan DC Conference Hall, Saitualah District Bawrhsap Dr. Lalngura Tlau kaihhruainain District Agricultural Marketing Committee vawi 3-na an ṭhu khawm.

Thutkhawm kaihruaitu Dr. Lalngura Tlau chuan District Agriculture Marketing Committee (DAMC) tum 3-na an ṭhu leh thei chu lawmawm a tih thu sawiin, MAMB (Mizoram Agriculture Marketing Board) lam atanga thu an hmuh angin Saitual District chhunga Secondary Collection Centre ruahman sa khaw pathum, Saitual, Keifang leh Hliappui te bakah Collection Centre thar tur pali (4) Ngopa, Phuaibuang, Suangpuilawn leh Phullen ah te hmalak zui dan tur inrawnkhawmna atan DAMC thutkhawm hi an ko a ni, a ti.   

Bawrhsap chuan February ni 20 atanga sawhthing lei/hralh chhuah a nih tawh dawn avangin Saitual District chhunga Collection Centre pathum, Sihfa Multipurpose Farming Society, Mualpheng Multipurpose Farming Society leh Hliappui Multipurpose Farming Society te pawh an inpeih tawh a ni, a ti. Chutih rualin, centre thar siam belhte erawh a rem dan ang anga hma lo la a, training te pawh a rang thei anga inko thuai a tul tur thu a sawi bawk. 

Secondary Collection Centre hi pathum (3) tura ruahman hi pasarih (7) a awm dawn ta a, heng siam thar zingah hian Phuaibuang leh Suangpuilawn khua Collection Centre tur leh  enkawltu tur Society an la neih loh avanga la tihchian tura dah niin DAO lam lo bawhzui tura rel a ni.

He thutkhawmah hian thlai thar lakkhawmna Secondary Collection Centre(SCC) atana  ruahmanna lo awm tawh heng, Saitual, Keifang leh Hliappui te bakah Ngopa, Suangpuilawn, Phuaibuang leh Phullen ah te center thar siam belh a ni a, heta mawh lo phur tur hian Ngopaah SDO(C), Ngopa, Suangpuilawnah DCSO Dept atangin, Phullenah Phullen BDO leh Phuaibuangah DCSO lam atangin dept aiawh te lo inruahman tura tih an ni.   

Vawiin thutkhawmah hian Dr Lalngura Tlau, Saitual Bawrhsap, Pi Hmangaihthangi Renthlei, DAO cum Member Secretary, DAMC, Pu Zairemkima,DCSO, Pu SK Das, District Co-Operation Officer, Pu Jacob Lalmalsawma, DHO, Pi Zomuansangi, DFDO, Pu Peter Biakthansanga, RO, S&WC, Dr. H Vanlalhmangaiha, DVO, AH& Vety bakah line department aiawhte an tel a ni.