1683/2025-2026

Saitual, the 1st October, 2025: Vawiin khan DC Conference Hall, Saitualah, Saitual District Planning Committee chu an chairman, District Bawrhsap ni bawk, Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu a sawi a, Sawrkar scheme hrang hrang hnuaia District Planning Committee awm thin chu Planning & Programme Implementation Department chuan DPC hlawm khatah a khai khawm tawh dawn a ni, a ti. Bawrhsap chuan Mizoram District Transformation Programme hnuaiah District Baseline Profile te, District Transformation Vision te leh District Catalytic Intervention Plan te chu department hrang hrang hotute chuan an siam a ngai dawn a ni, a ti.

Dr. Lalngura Tlau chuan Mizoram District Transformation Programme chu Sawrkarin ram intodelh ni tura a hmalakna “Vikshit Bharat @ 2047" nena kal kawp a ni tih a sawi a. Department hrang hrang hotute chu plan an siam hunah rilru fim tak pua an ngaihtuahnate seng tura chahin, district tana tha ber tur leh khawtlang tana hmasawnna thlen thei tur ngaihtuah chhuak turin a sawm nghal a ni.

Mizoram District Transformation Programme hnuaia department hrang hrangin District Baseline Profile, District Transformation Vision leh District Catalytic Intervention Plan an siam te chu DC Office ah an thehlut ang a, DPC-in thutkhawmna neiin an ngaihtuahho leh ang. DPC-ina pawmpuite chu State level-ah thehluh a ni ang a, hemi zawh hian Ministry level-ah hma lak tur a ni.

Vawiin thutkhawm hi Dr. Lalngura Tlau, DPC Chairman & DC chuan a kai hruai a, Pi C. Lalnunsiami, SRO-cum Under Secretary, P&PID chuan plan siam dan tur kalphung te a sawifiah a, he thutkhawmah hian DPC member te leh khawtlang hruaitute an tel bawk a ni.