1682/2025-2026

Dated Aizawl, the 1st October, 2025: Vawiin khan Mizoram Upa Pawl (MUP) Maubuang Branch-te chuan an kum 50 tlinna lawmin, hemi pual hian Monument Centre-ah Golden Jubili lung an phun a. Pu Lalnunsanga, Mizoram Cooperative Apex Bank Ltd. Chairman chu khuallian niin he hun hi a hmanpui a ni.

Khuallian Pu Lalnunsanga chuan thu sawiin, Mizoramah mi nawlpui dam rei zawng a sang chho zel a, kum 80 chung lam pawh an pung zel bawk a, hei hi Mizo hnam tan thil ropui tak a ni, a ti a. Tawnhriat ropui tak tak neitu, upate chu kan ram tan an hluin ramin a mamawh a ni, tih sawiin, khuallian chuan hmasawnna rualkhai a awm theih nana rinawm taka society-ahte a thei thei inhmang turin a fuih a. Ram leh hnam humhalh nan tualto bank chawisan a pawimawhzia sawiin, Apex Bank chu State pawna bank hlawkna sum luangchhuak ve lo awm chhun a nih thu te a sawi tel bawk a ni.

Jubili lawmna hun hi MUP Maubuang Branch President Pu V. Thlangliana’n a kaihruai a, member kal tate sunna hun hmangin, kum 80 chin chunglamte hnenah ‘Kum Upate Chawimawina’ an hlan nghal a ni.