1681/2025-2026

Dated Aizawl: the 01 October 2025 : Vawiin khan Sports&Youth Services Department Minister leh Aizawl West II bialtu MLA ni bawk Pu Lalnghinglova Hmar chuan Tuikual North YMA Hall-ah, khawvel puma Upate ni puala Tuikual North MUP-te hun buatsaih chu khuallian niin a hmanpui.

He hunah hian khuallian bialtu MLA Pu Lalnghinglova Hmar chuan thusawiin, anmahni puala Upate zinga hun a hmang thei chu lawmawm a tih thu a sawi a. Tunlaiah kum naupang tak taka Mizo thalaite thih nasat zia te thlirin, kum tam tak dam chu malsawmna ropui tak a ni tih a sawi a, Upate chu rei tak hrisel taka dam zel turin mahni insawizawi leh ei leh in hriselte nunpui turin a sawm nghal bawk a. An tu leh fate chu zuk leh hmuam leh ruihtheihthil lakahte fihlim tura fuihtu ni tura chahin, khawtlang nu leh pate an nihna chu zo taka hlen chhunzawm zel turin a fuih bawk a. Sawrkar pawhin Upate chu a ngaipawimawh hle tih sawiin, Upate hmasawnna atana sawrkar hmalaknate a sawi bawk a ni.

Vawiin hi khawvel puma upate ni a ni a. He hun hi United Nation chuan kum 1991 atang khan upate pual hian kum tinin khawvel pumah a lo hmang tawh a ni. Vawiin hun denchhen hian Tuikual North Branch MUP-te chuan kum 2025 atanga 2027 inkara hruaitu turte an thlang nghal bawk a ni.

 Vawiina hun hman hi Pu H. Sangzawna, MUP, Tuikual North Branch President chuan kaihruaiin,  kalkhawmte lawmna thu a sawi a. Pu Rodingliana, Vice President kaihhruaiin Kum kal taa pawl mi  boralte sunna hun hman a ni a. Pu F. Hmingthanzauva, Secretary hnen atangin nikum leh kumin  chhunga pawl hmalaknate thlirho a ni a. Pu C. Lalrohlua, Fin. Secy chuan lawmthu sawiin hun hi a  khar a ni.