2150/2025-2026

Saitual, the 17th September, 2025: Nimin khan DC Conference Room, Saitualah District Cooperative Development Committee (DCDC) chu an chairman, District Bawrhsap ni bawk Dr. Lalngura Tlau kaihhruainain an thu khawm.

He hunah hian DCDC chairman Dr. Lalngura Tlau chuan thu sawiin, PACS chu thingtlang mite hmasawnna atana sawrkar laipui hmalakna pawimawh tak a ni, a ti a. Khaw hrang hranga mipuite zingah inbumna nia rinhlelh vanga PACS chungchang bengkhawn tha duh lo an awm thin chu pawi a tih thu Bawrhsap chuan sawiin, hemi chungchanga awareness campaign neihna kawngah te pawh NABARD lam chu line department te nen tanho a pawimawh a ni, a ti.

Bawrhsap chuan bank awm lohna kilkhawr ber ber te tuam chhuak thei tura tan la turin DCDC member te chu a sawm a, Apex bank chu MPACS hnena loan petu an nih angin an pawimawh lehzual tih a sawi a, Branch Manager te pawh tan la zel turin a chah a ni.

DCDC hnuaiah Joint working committee din a ni a, an ni hian Saitual District chhungah MPACS dinna tur khaw 20 an thlang chhuak a, heng khuaah te hian MPACS chungchang inzirtirna leh inhrilhfiahna ‘awareness campaign’ kalpui vek tawh a ni. Heng khaw zingah hian N. Lungpher chu ziahluh (registered) tawh niin Buhban leh Lenchim te chuan dilna an thehlut tawh a, Saitual hian society awm sa MPACS a inlehna tura dilna an thehluh tawh bawk a ni. Apex Bank Branch tinah MPACS chungchanga awareness campaign leh training petu tur ruat an ni bawk.

He thutkhawm hi Dr. Lalngura Tlau, Saitual Bawrhsap & DCDC Chairman-in a kai hruai a, Pi H. Lalhmachhuani, District Development Manager (DDM), NABARD & DCDC member secretary, Pu Lalthangfala, DCO &  Convener, DCDC Saitual District te bakah hian DCDC member te an tel a ni.