2149/2025-2026

Saitual, the 17th September, 2025: Nimin khan DC Conference Room, Saitualah District Water & Sanitation Mission (DWSM) chu an chairman, District Bawrhsap Dr. Lalngura Tlau kaihhruainain an thu khawm.

He hunah hian DWSM chairman Dr. Lalngura Tlau chuan thu a sawi a, tui chu mihring nunna hnar a ni tih sawiin, mipuiten tui thianghlim an dawn theih nana hmalaknate sawiho turin DWSM te chu a khat tawka an thutkhawm a tul a ni, a ti. Bawrhsap chuan tui thianghlim leh mihring hriselna chu kal kawp tlat a ni, a ti a, ruah tui a luan ral loh nana tui lo khawmtu thingkungte chu ti chereu mai lo tura inzirtir a, mipuite hnena awareness neih a pawimawh tih sawiin, hemi kawngah pawh khawtlang hruaitute nen tanghoa theih tawp chhuah turin kalkhawmte chu a sawm a ni.

He thutkhawmah hian Pu Lalzuala, SDO, PHED, Saitual WATSAN sub-division, DWSM member secretary ni bawk chuan an hmalak tawh te leh hmachhawp te a tarlang a, DWSM member ten chuan an sawiho nghal a ni. Saitual District-ah hian Jal Jeevan Mission hnuaiah water supply scheme 39 kalpui mek a ni a, in 9433-ah te tui herh haw theihna (functional tap connection) siam a ni tawh bawk a ni. Water supply schemes zawng zawng kalpui tawh niin, khaw 36 te chu tap water connection nei Har Ghar Jal village a puan an ni.

AMRUT 2.0 (urban) hnuaiah water supply scheme te changtlung zawka kalpui tum a ni a, fund dawn a la nih loh avangin duh angin hma lak theih a la ni lo. Khuarel chhiatna, a bikin tui lian thlen thulha tui pump khawl te a chhiat loh nana venhimna tur chu SASCI hnuaiah ₹2 crore ruahman a ni a, hna hi thawh tum tan mek a ni.

15th Finance commission hnuaiah PHED chu LAD nen inthlunzawm a ni a, tied fund dawn hi water supply atan 50% leh sanitation atan 50% a hman tur a ni. SBM(G) hnuaiah Suangpuilawn khuaah Plastic Waste Management Centre din tum a ni bawk. Financial year 2024-2025 ah hian inthiarna ek in, ‘individual household laterine’ 85 sak niin, 80 dang sak tura ruahman a ni.

Saitual District chu ODF plus model-a puan a ni a, composed pit, community soak pit leh segregation sheds te chu khaw tinah sak a ni tawh bawk. Verification team din tur niin, an ni hian an endik leh dawn a ni. Department of Drinking Water and Sanitation leh Ministry of Tourism campaign hnuaiah khualzinte chawlh hamdamna leh thlenna hmun hrang hrang hotel, homestay, resort, etc te chu faina lama kaihhruaina duante an zawm that leh that loh tehna turin Swachhata Green Leaf Rating pek an ni a. Saitual District chhunga thlan chhuah chawlhbukte zingah hotel 2 chuan 3 leaves an dawng a, hotel 5 chuan 1 leaf an dawng a ni.

He thutkhawm hi Dr. Lalngura Tlau, DC & DWSM chairman-in a kai hruai a, Pu Lalzuala, SDO, PHED, Saitual WATSAN sub-division & DWSM member secretary, Pu Lianthanga Chohte, EE, PHED Khawzawl WATSAN division, Pu Tharun Patnaik, SDO (S) bakah DWSM member te an tel a ni.