4099/2024-2025

Saitual, the 5th February, 2025: Vawiin chawhma dar 11:00 khan DC Conference Room, Saitualah Dr. Lalngura Tlau, District Level Committee on Fire Prevention Chairman, District Bawrhsap ni bawk kaihruainain Saituala District Level Committee on Fire Prevention chuan Fire Prevention Week 2025 neih dan tur an rel.

He hunah hian DLCFP Chairman Dr. Lalngura Tlau chuan kalkhawmte hnenah lawmthu a sawi a, kangmei chu thunun a nih chuan thil tangkai tak a nih rualin, thunun loha a awm a nih chuan thil hlauhawm tak leh chhiatna tam tak thlen theitu a ni, a ti. Bawrhsap chuan kangmei venhim pawimawhna mipuite hnena inhrilhriatna kawngah IEC (Information, Education & Communication) Campaign a pawimawh hle tih sawiin, DEO, DIPRO, MJA te leh khawtlang hruaitute chu hemi kawnga theih tawp chhuaha hma la turin chu a ngen nghal a ni.  

Vawiin thutkhawmah hian kum 2024-a kangmei venhim kawnga hma lakna te thlirlet a ni a, State Level Sub-Committee on Fire Prevention-in district tina Fire Prevention Week 2025 hmang tura a lo rel tawh angin Saitual District-ah pawh hman dan tur rel nghal a ni. Saitual District-a Fire Prevention Week 2025 hawnna chu February ni 10, 2025 (Thawhtanni), zing dar 7:00 hian DC Bangla kawtah hman rel a ni a, DLCFP Chairman, District Bawrhsap ni bawk Dr. Lalngura Tlau chu khuallian a ni ang. Pu PC Lianzuala, AFC, DLCFP Member Secretary chuan hun kaihruaiin, report kimchang a pe nghal ang a, hunserh hmang turin Pu Lalzarmawia, Principal, Govt. Saitual College chu ruat niin, thusawi tawi hi khuallian bakah YMA leh MUP sub-hqtrs lam atangin ngaihthlak a ni dawn a ni.   

Fire Prevention Week 2025 hi February ni 10 atanga ni 15 thleng neih tura ruahman a ni a, kumin thupui atan "Kangmei ven hi kan tu leh fate hmakhua atan a ni" tih thlan niin, kangmei venhim kawnga hma la tha ber district leh khua chu lawmman pek an ni dawn a ni. Kangmei venhim pawimawhna mipuiten an hriat darh theih nan Saitual District mipui te tan flyer leh video insiamsiak buatsaih a ni ang.  

Vawiin thutkhawmah hian Dr. Lalngura Tlau DLFCP Chairman, Pu PC Lianzuala, ACF, DLCFP Member Secy leh Saitual District Level Committee on Fire Prevention member te an tel a ni.