4100/2024-2025

Aizawl the 5th February, 2025 : Vawiin khan Directorate of Hospital & Medical Education (DHME) Conference Hall, MINECO-ah National Health Mission hnuaia National Programme on Climate Change and Human Health (NPCCHH) buatsaihin Aizawl East & Aizawl West district huam chhunga Health & Wellness Centre hrang hranga Health & Wellness Officer-te leh Medical Officer (AYUSH) te tan Training of Trainer buatsaih a ni a. He Training hi Dr. Eric Zomawia, Mission Director, National Health Mission chuan Khuallian niin a hmanpui a. He hunah hian sik leh sa leh boruak inthlakin hriselna a nghawng dan chungchangte, hemi laka invenna tur leh boruak/leilung tichhe lo tura tih tur hrang hrangte inzirtirna neih a ni.

Khuallian Dr. Eric Zomawia, Mission Director chuan Health & Wellness Officer-te taima tak leh rim taka mipui tana hna an thawhnaah lawmthu a sawi a. NHM nihphung leh hnathawh hrang hrangte a sawifiah a. NHM chu mi zawng zawng banphak a nih thu sawiin, mitin chhawr theih tur leh man tlawm zawka inenkawlna tha zawk siam kawnga hmalatu a ni,a ti a. Hospital hrang hranga a thlawna inenkawlna tam zawk a awm theih nana hmalak a nih thu leh, Mizorama Damdawiin hrang hrang 19 te India rama damdawiin tha bika thlan an nih tawh thu sawiin, Sub-Centres, Health & Wellness Centre, Primary Health Centre, Community Health Centre leh Urban Primary Health Centre-te Hospital lian zawk pan ngai lova changtlung zawk leh tha zawka thuam that anih thu a sawi a. Thawktute chu ram leh mipuite tana theihtawp chhuaha taima leh rinawm taka thawk zel turin a fuih a ni.

Dr. Vanlalrengpuia Chinzah, State Nodal Officer, NPCCHH, NHM in he hun hi kaihruaiin kalkhawmte lawmna thu a sawi a. Leilung, sik leh sa inthlakin mipui hriselna a nghawng nasat dante tarlangin, Climate Change (Sik leh sa inthlak) hi a awm ngei a, sorkar hnathawkte chauh ni lovin mipuite’n tangruala kan hmachhawn tur thil pawimawh tak a ni, a ti a. Sorkar hospital leh inchhungkhura boruak chhia chi hrang hrang siam theite ti tlem tur zawnga hmalakte, tawih theilo bawlhhlawh leh vawi khat hman plastic-te ti tlem tura hmalak a ngaih zia he hnah hian a sawi bawk a ni.

Dr. Walter Lalnuntluanga Sailo, District Nodal Officer, NPCCHH leh Dr. B. Lalthantluanga, State Programme Manager, NHM te'n Climate change chungchang zirtirin, Rosie Zosangkimi, State Consultant, NPCCHH in hmalak dan leh hnathawh dan chungchang a sawi a. Heng bakah hian Health Department-a mithiam hrang hrangte'n zirtina an pe bawk.

Training chhimtu Health & Wellness Officer leh Medical Officer-te hian anmahni Centre theuha ASHA leh Jan Arogya Samiti (JAS) member-te training an pe chhawng ve leh dawn a ni.