4101/2024-2025

Dated Serchhip, the 5^th February, 2025:  Vawiin khan Serchhip DC Pu Paul L Khuma hoin Serchhip DC Meeting Hall ah MHSSP Walkathon 2025 neih dan tur rel a ni.

Mizoram Health System Strengthening Project Walkathon 2025 chu Mizoram chhunga Health District 6 ah leh State level ah hman tura ruahmanna siam a ni a. He Walkathon-in a tum ber chu inkaidarh theih loh natna khirh tak tak - diabetes, BP sang, Cancer, thin/kal/lung tha lo leh a dang te laka inven dan inzirtir te, hriselna tura taksa insawizawi leh ei leh in fimkhur a tulzia inzirtir te a ni a. Serchhipah pawh March ni 4, Thawhlehni Zing Dar 7:00 ah Walkathon hi neih ni se tiin vawiin meeting chuan a rel a ni.

He kawng zawh hi hmun hnih atanga tan tur niin group khat hi New Serchhip College Peng atangin an kal tan a nga, group lehlam hi Bazar atanga tanin Leisekawt Field ah an intawkkhawm dawn a ni. Kawng zawh tur hian a tlem berah mi 700 beisei an ni a. Pawl hrang hrang MHIP leh YMA te bakah DIET, Serchhip Government College, School hrang hrang te, Sawrkar Office hrang hrang te leh mipui a tam thei ang ber he kawng zawhah hian tel tura sawm an ni.

He Walkathon a tel te hi t-shirt var ha theuh tura ngen an ni a. Zaithiam te pawh he hunah hian sawm an ni dawn a ni.

Vawiin meeting-ah hian Sr.CMO Dr LP Malsawma bakah Health Department Official te, sawrkar official dang te leh tlawmngai pawl hrang hrang hruaitute an tel a ni.