3888/2024-2025

Saitual, the 21st January, 2025: Vawiin chawhma dar 11:00 am khan DC Conference Room Saitualah, District Level Committee on Good Governance chu District Bawrhsap Dr. Lalngura Tlau kaihhruainain an thu khawm.  

He hunah hian Dr. Lalngura Tlau chuan kalkhawmte hnenah lawmthu a sawi a, Good governance awmzia leh a thil tumte hrang hrang te a tarlang nghal a ni. Bawrhsap chuan DC Office chuan Mizoram Public Service Delivery Act hnuaiah service chi hrang hrang 21 chu mipuite an dil thei tih sawiin, heng te hi Office-ah mipui chhiar theih a tarlan a ni, a ti. Department dangte chu mipuiten eng service nge an pek chhuah theih tih hriat nan an office theuha tar turin Bawrhsap chuan a ngen nghal bawk a ni.  

Good Governance ina a thil tum pawimawh tak chu mipuite tana awlsamna siamsak a nih angin, Bawrhsap chuan hmalakna te chu mipui kawtkaia thlen (doorstep delivery) ti thin turin kalkhawmte a fuih a. Department hrang hrang hotute chu hemi kawnga an hmalaknate chu DC Office lama hriattir zel turin a hrilh bawk a ni. Right to Information (RTI) Act hmangin mipuiin sawrkar department hnuaia an hriat duh leh zawhna an neih apiangte an zawt thei tih a sawi a, hetih rual hian RTI Act hmang sual a midang khei nana hmang thin an awm erawh thil pawi tak a ni, a ti.    

Bawrhsap chuan Sawrkar hnathawk te chu mipuite tana rawngbawltu an nih angin tha takin an pisaa lo kal te chu an chhawn thin tur a ni, a ti a. Sawrkar langtlang leh tha nei thei turin kalkhawmte chu theih tawp chhuah chhunzawm zel turin a sawm a ni.  

He thutkhawm hi District Bawrhsap Dr. Lalngura Tlau chuan kaihruaiin, Pu Lalthakima Chhangte SDO (S), Pi Dorothy Lalmuansangi SDO (C) Ngopa, Pu J Lalhmahruaia BDO Phullen bakah hian department hrang hrang hotute an tel a ni.