4445/2025-2026

Saitual, the 12th February, 2026 : Vawiin khan District Level Narco Co-ordination Committee chu Chairperson NCORD leh DC ni bawk, Pu Srinivas Sadi kaihhruainain meeting neih a ni a, he thutkhawmah hian Pu Gaurav Tyagi, Member Secretary, NCORD leh SP ni bawk chuan hmalak tawhnate leh ruihhlo tawlh ruk an man chungchangte, NGO te nena an thawhhonate leh ruihhlo tawlh a nih dan hrang hrangte report a pe a ni.

Chairperson Pu Srinivas Sadi chuan kalkhawmte hnenah lawmthu sawiin NCORD memberte chu theih tawp chhuaha tanho puiah a sawm a, ruihhlo dona kawng hrang hrang supply reduction, demand reduction leh harm reductionah te tan la zel tur leh ngaihdan leh rawtna nei apiang tan a in hawn reng thu a sawi bawk.

He thutkhawmah hian District Level NCORD member ten ruihhlo do kawnga hma an lakna hrang hrangte report ngaihthlak niin ruihhlo tawlhte man leh chhui kawnga hmalakna thar ngaihtuahte, kum thum chhung atana dan lova ruih theih thil hmansualna sutkianna leh ruihhlovin mihring leh khawtlang nun a nghawng zawng zawngte tiziaawm tura hmalak dan tur District Level Action Plan chungchangte rel a ni bawk.

Bawrhsap chuan hemi kawngah hian NCORD memberte chu ngaihtuahna zawng zawng senga District Action Plante thahnemngai taka theuh lut theuh turin a sawm a, chumi atana senso pawh action plan mila chetna tur funding hmuh theih a nih tur thu a sawi bawk.

Vawiin thutkhawmah hian Pu Srinivas Sadi, chairperson NCORD & DC, Pu Gaurav Tyagi, Member secretary NCORD & SP, Pu Lalhmingthanga, Asst Commissioner of Excise & Narcotics, Dr Zothanpari Chhakchhuak Dy. CMO, Saitual District Hospital, R. Lalhmangaiha, Dy. District Project Coordinator, Samagra Shiksha, Kohhran hrang hrang hruaitu aiawh, NGO aiawhte bakah NCORD Committee member te an tel a ni.