1597/2025-2026

Saitual, the 25th September, 2025: Vawiin khan DC Conference Room, Saitualah District Level Steering Committee (DLSC) for Lakhpati Didi chu an chairman, District Bawrhsap ni bawk Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu sawiin, Lakhpati Didi chu hmeichhe chawikan nana Sawrkar hmalakna pawimawh tak a ni, a ti a, hmeichhiate chu kum khata cheng nuaih 1 an lak luh ve theih nana kawng kawhhmuhna a ni, a ti. Bawrhsap chuan he sawrkar hmalakna hian chhungkaw tam tak a khaichhuak thei dawn a ni, a ti a, chutih rualin mipuite pawhin a thlawna hamthatna dawnna tur a ni lo tih an hriat a pawimawh tih a sawi bawk.

Bawrhsap chuan Saitual District tan kum 3 chhung hian Lakhpati Didi target chu mi 1600 niin, Ngopa leh Phullen-ah 800 ve ve tuk a ni tih a sawi a, Financial year 2024-2025 -ah hian hmeichhia kum khata nuaih 1 la tling hi Ngopa RD Block-ah mi 675 an awm a, Phullen RD Block-ah mi 800 an awm tih a tarlang.

Dr. Lalngura Tlau chuan line department te chu an theihna zawnah heng Lakhpati didi ni thei tura thlan chhuahte hi kawng kawhhmuh turin a chah a, kalkhawmte chu Lakhpati didi tam zawk an lo awm theih nan inzirtirna leh inhrilhhriatna kawngah te theih tawp chhuah chhunzawm turin a fuih a ni.

Vawiin thutkhawmah hian DLSC member te chuan thutkhawm hmasaa thurel te an sawi ho a, Ngopa RD Block leh Phullen RD Block atang an hma lak dan report te ngaihthlak niin, hma sawn zel nana hma lak theih dan tur te sawiho a ni.

Lakhpati Didi hi India sawrkar hmalakna niin, August ni 15, 2023 khan kalpui tan a ni a, a tum ber chu hmeichhiate chawikan niin, kum 1 a cheng nuaih 1 (₹ 1,00,000) la lut thei tura tanpui a ni. Lakhpati Didi tih chu kum khata nuaih 1 la lut tling hmeichhia sawina a ni. He hmalakna hi DAY-NRLM hnuaia kalpui niin, Self-help group (SHG)-a hmeichhia te chu eizawnna an neih theih nan kawng hrang hrang- thlai chin, ran vulh, puan thui leh kut themthiamna lam kawhhmuh te a ni.

Vawiin thutkhawm hi Dr. Lalngura Tlau, DLSC chairman & DC in a kai hruai a, Pu V. Laldinsanga, DLSC member secy & Project Director, DRDO bakah DLSC member te an tel a ni.