2040/2026-2027

Saitual, the 2nd September, 2026: Vawiin khan DC Conference Room, Saitualah kawnga kal mipuite an him zawk nan District Road Safety Committee chu an Chairperson, District Bawrhsap ni bawk, Pu Srinivas Sadi kaihhruaiin an thu khawm. 

He hunah hian District Bawrhsap Pu Srinivas Sadi chuan kawng chhia chuan lirthei chetsualna (accident) a thlen thin tih a sawi a, mipuite an him zawkna ngaihtuaha theih tawp chhuah a tul a ni, a ti.

Vawiin thutkhawmah hian thutkhawm hmasaa rel tawh angin District Road Safety Committee leh khawtlang hruaitute tangkhawm chuan accident thlen tamna hmun te an zawng chhuak a, heng hmunah te hian signboard leh zan thima kawnga kal ten lirthei engin a chhuna kawng an hmuh fiah theihna tur ‘reflectors’ dah tura rel a ni. Hei bakah hian Keifang Kualmawia Police Duty naah plastic-a siam lirthei danna (barricade) dah rel a ni a, tui luan kawr (drain) a inhnawh apiangin tihfai zel ni se tih rel a ni bawk. Contractor-te chuan an hmalaknate chu NHIDCL hotute hnenah an thehlut ang a, September ni 30 hmain DC Office-ah thehluh tur a ni bawk. 

Vawiin thutkhawm hi District Road Safety Committee leh District Highway Safety Task Force chairperson, Pu Srinivas Sadi in a kaihruai a, Pu Vivek Kumar Maurya, SP leh Committee member-te an tel a ni.