1330/2026-2027

Saitual, the 8th July, 2026: Vawiin khan DC Conference Room, Saitualah PHED leh Art & Culture Secretary, Special Intensive Revision 2026 puala Electoral Roll Observer ni bawk, Pi Zodingpuii hovin thutkhawmna neih a ni.

He hunah hian Election Officer Pi Mary L. Rodinpuii chuan inlawmna thu a sawi a, Special Intensive Revision (SIR) 2026 kalpui a nih dan te sawiin, Draft Electoral Roll chungchangah report a pe nghal bawk a ni.

Electoral Roll Observer Pi Zodingpuii chuan thu sawiin, Electoral Roll dik leh felfai tak nei tur chuan Special Intensive Revision chu a pawimawh hle a ni, tih a sawi a, nakin lawka kan tu leh fate tan zel a ni, a ti. Claims & Objections period chu Draft roll-a awm tur dik tak te endikna hun pawimawh tak a ni tih sawiin, sawrkar official te, political party te, BLO te leh khawtlang hruaitute chu theih tawp chhuah chhunzawm zel turin a sawm a ni. Observer chuan Mizoram hma hun chu Special Intensive Revision-ah hian a innghat thui hle a ni, a ti a, kan tu leh fate tan Electoral Roll dik leh thianghlim tak kan neih theih nan thawhhona tha tak neih kan chhunzawm a tul hle a ni tih a sawi bawk.

8-Chalfilh, 9-Ṭawi leh 21-Lengteng Assembly Constituency Draft Electoral Roll 2026-ah hian voters mipa 26,573 awmin, hmeichhia 27,420 an awm a, a vaiin voters 53,993 an awm a ni. Roll hnuhnung ber nena khaikhinin voters 2327 (4.30%) in Draft Electoral Roll 2026-a voters awm zat hi an tlem zawk a, hei hi chhan hrang hrang- pem te, thi te leh roll-a chuang nawn te an paih vang a ni.

Vawiin thutkhawmah hian Pu Srinivas Sadi, District Election Officer, Pi Mary L. Rodinpuii, Election Officer, ERO, AERO-te bakah political party-te, BLO-te leh khawtlang hruaitute an tel a, SIR chungchangah sawihona an nei nghal bawk a ni.