2842/2025-2026

Saitual, the 8th January, 2026 : Vawiin khan Excise & Narcotics Station, Saitualah Excise Minister Pu Lalnghinglova Hmar hoin Excise & Narcotics Department, Saitual District chuan Pathian hnena inhlan tharna hun an hmang.

He hunah hian Excise Minister Pu Lalnghinglova Hmar chuan thu a sawi a, Saitual Excise & Narcotics Station chu kum khat chauha upa ni mah se, hmasawnna tam tak hmuh tur a awm a ni, a ti a, hei hian a hnathawkte thawhrimna leh khawtlang mipuite tawiawmna a lang a ni, a ti. Saitual chu Manipur atanga ruihhlo lakluhna kalkawng a ni a, hei mai bakah hian Tourism lamah pawh hmasawn zelin, Tlaizawng Paradise Phuaibuangah hlawhtling taka neih a ni a, Tamdil leh tlang mawi tak tak tlawhtute pawh an pung zel a, a lawmawm rualin khualzin tam chuan ruihhlo a ken tel thin avangin tan lak zual zel a ngai a ni, a ti.

Minister chuan Excise & Narcotics department te chu indaih lo tak chungin theih tawp chhuahin hna an thawk thin a ni, a ti a. Saitual District pawh Assistant Commissioner in a ho tawh dawn tih sawiin, khawtlang hruaitute nena thawhhona tha tak nei a, ruihhlo do kawnga theih tawp chhuah zel turin a chah a ni.

Vawiin inkhawm hi Pu Peter Zohmingthanga, Join Commissioner (Enforcement)-in a kai hruai a, Excise Minister Pu Lalnghinglova Hmar chuan thu sawiin, report hi Pu Lalruatliana O/C Excise & Narcotics Station, Saitual District atangin ngaihthlak a ni bawk. W.O. Ramengmawia chuan hun serh hmangin, Rev. Lalsanglura Sailo, BCM Pastor bial chuan Pathian hnena lawmthu sawi leh inhlan tharna hun a hmang a ni. Vawiin inkhawmah hian khawtlang hruaitute leh NGO te an tel a ni.

Excise & Narcotics Station, Saitual District-ah hian hnathawk staff pakua an awm a, MHIP leh Sub-Hqrs YMA kum puan te nen tanghoin counselling board din a ni a, ruihhlo kaihhnawiha an man te hnenah counselling pek thin a ni. Kum 2025 chhung hian Saitual District chhunga khaw awm zawng zawng fan chhuah niin, zu, ruihhlo, zu bilhna bungbel leh motor engemaw zat man a ni a, ND&PS Act, 1985 leh MLP Act 2019 hnuaiah mi engemaw zat thubuai siam sak an ni tawh bawk a ni.