1699/2025-2026

Saitual, the 2nd October, 2025: Vawiin khan DC Conference Hall, Saitualah faina kawnga hmalatu Mahatma Gandhi pian cham pual “Swachhata Diwas” lawmna hun leh faina beihpui thlakna “Swachhata Hi Seva 2025 Campaign” kharna hun hman a ni a, Pu Lallawmawma, Addl DC. chu khuallian niin hun a hmanpui.

He hunah hian Pu Lallawmawma, Addl. DC chuan thu a sawi a, India ram pum huap faina programme pawimawh tak Swachhata Diwas an hmang thei chu lawmawm a tih thu a sawi. Swachhata Hi Seva 2025 Campaign chhunga faina kawnga hmalatu zawng zawng te chu fakawm a tih thu a sawi a, khawpui (urban) lam changtu DUDO leh thingtlang (gramin) changtu SDO (PHED) te pawh an hnathawhah te fakawm a tih thu sawiin, an kal lehzelna turah a duhsakna a hlan nghal a ni.

Khuallian chuan faina kawngah Mizoram chuan hma kan sawn hle tih a sawi a, a bikin in leh a vel tihfai kawngah te hma kan la tha hle tih a sawi bawk. Chutih rualin, vantlang zun in leh waiting shed te enkawl fai kawngah tan lak kan ngai hle a ni, a ti. Addl DC. chuan bawlhlawh thliar hran kawngah te tan la lehzual turin Saitual Distriict mipuite a chah a, in bulah te chuktuah huan siam uar a pawimawh tih sawiin, kan bawlhhlawh tawih thei chi te chu lei thaah a chang thei a ni tih a sawi.

Khuallian chuan faina kharna hun ni mahse faina kawnga hmalakna chu tawp mai loin kal zel se a duh thu a sawi a, kalkhawmte chu faina leh thianghlimna kawnga theih tawp chhuah zel turin a sawm nghal a ni.

Swachhata Hi Seva 2025 Campaign hi September ni 17 khan District Bawrhsap Dr. Lalngura Tlau chuan a hawng a, he campaign hian October ni 2 thleng awhin hemi chhung hian kawng hrang hrangah hma lak a ni a, faina hnatlangpui neih a nih bakah hnawm hnawk tam zualna, Cleanliness Target Unit (CTU) te chu thlan chhuah niin, then fai a ni bawk. Faina beihpui thlakna hi khawpui (town) leh thingtlang (gramin)-ah te, UD&PA dept, PHE dept, VC te leh Sanitation Committee te tanghoa kalpui a ni.

Vawiin inkhawmah hian Pu Lalzuala, SDO, PHE department chuan inlawmna thu sawiin, khuallian Pu Lallawmawma, Addl DC chuan thu a sawi a, faina kawnga thawktu sanitation workers te  hnenah lawmman hlan nghal a ni. Er. Laldinsanga Hnamte, DUDO leh Pu Samuel VL Nunhlua, SBM Coordinator hnen atangin faina beihpui thlakna “Swachhata Hi Seva 2025 Campaign”-a khawpui (urban) leh thingtlang (gramin) lama activity hrang hrang report ngaihthlak a ni bawk. Pu VL Hruaitluanga, LDC, UD&PA chuan lawmthu sawinain inkhawm hi a khar a ni.