1698/2025-2026

Champhai, dated 2th October, 2025: Vawiin khan TT Zothansanga Road, Jail vengah District Bawrhsap Pu Mohammad Aaquib hovin faina beihpui Swachhata Hi Seva Campaign, 2025 kharna neih a ni a, Pu Ngulzathuama, DUDO Champhai in hun a kaihruai a ni.

Swachhata Hi Seva Kharna inkhawmah hian Bawrhsap Pu Mohammad Aaquib chuan thu sawiin Champhai District a lo fai a, a lo thianghlim theihna tura Faina beihpui thlak chhunga tha thawha thawk chhuak zawng zawng te hnenah leh Sorkar Department, VC leh Tlawmngai pawl zawng zawng te chungah lawmthu a sawi a, Champhai District chuan Faina kawngah hma kan sawn hle a, duh khawp mai lo a, kan hmalakna te chhunzawm zel turin a sawm a. Khaw nuam leh thianghlim khualzin te tlawh chak nia faina lama inelnaah pawh District Fai lawmman dawng thei tur khawpa theih ang anga tan la zual sauh sauh turin District mipui te a chah. Swachatta Hi Seva Campaign hi khar ni mahse kan nitin nunah faina nunpuia a pawimawhna in zirtir nawn foa, mi entawn tlak ni turin District mipuite a sawm bawk a ni.

Vawiina Swachatta Hi Seva Campaign kharnaah hian Baby Lalremtluangi, UD&PA Department leh Pi Julie C. Mawii, PHE Department te hnen atangin Campaign chhunga hmalakna te ngaihthlak a ni a, Swachhata Green Leaf Khualbuk (Hotel leh Home Stay) fai leh thianghlim inelnaa lawmman dawng tute te hnenah lawmpui thuziak hlan a ni. Cleanliness drive PHE Office atanga Jail Veng inkar TT Zothansanga Road-ah UD&PA, PHE Department, Vengsang VC, KTP, YMA, MHIP, MUP te'n an nei bawk a ni.

Swachhata Hi Seva Campaign hi September ni 17 atanga October ni 2 thleng hman a ni a, kumin hian kum dang zawng aia uar zawka hman a ni a, hemi hun chhung hian khua leh vengte a lo fai lehzual theih nan mipui hnena faina chungchang inzirtir te, District pumpui  faina hnatlang te, Sorkar hnathawk zawng zawng faina hnatlangte, hmun bal zual lai hmantlaka thenfai tihfai hnatlang te, faina nitin nunphunga bet tlat tura inzirtirna leh faina lama hnathawktute pawihmawhna in hrilhhriata an hriselna endikna te neih a ni.