1697/2025-2026

Champhai, dated 2nd October 2025: Vawiin khan Dilkawn khuaah “Sabki Yojana, Sabka Vikas” tih thu hmangin Special Gram Sabha neih a ni a, Village Vision leh Action Plan 2030, Aadi Karmayogi Abhiyan (AKA) hnuaiah Dilkawna hmang turin thlan a ni.

He hunah hian Village Vision and Action Plan 2030 hnuaia khua hmasawn theih dan tur kawng duan a ni a, tribal te tana hmasawnna tur kawng Adi Karmayogi Abhiyan chungchang sawi a ni bawk. Heng bakah hian Gram Panchayat Development Plan chungchang te, hnathawk kal mek chungchang te leh Panchayat Index hnuaia VC hnathawh hmasawnna tur te sawi ho a ni.

Dilkawn khuaah Aadi Karmayogi Abhiyan hnathawh hi tun kar khan lo buatsaih tawh a ni. September ni 29, 2025 khan Village Visioning Exercise leh Transect Walk an buatsaih a, hotute'n hmasawnna tur an lo ngaihtuah a, September ni 30, 2025 khan hnathawhin Village Vision leh Action Plan 2030 an siam a ni. Vawiin hian Village Action Plan 2030 chu Gram Sabha-in an sawifel a, tui in tur tha te, street light mumal zawk te, zirna in tha leh changtlung zawk te, kawng tha zawk te, naupang intihhlimna tur children’s park te, swimming pool leh thil dang tam tak he ruahmannaah hian a tel a ni. He hunah hian Aadi Karmayogi Seva Kendra (Tribal welfare) pawh YMA Office-ah hawn a ni bawk a ni.

Khawtlang hruaitute chuan he hmalakna ropui tak a awm vang hian lawmthu an sawi a, Bawrhsap kaihhruaina hnuaiah Dilkawn khua hmasawnna atan theihtawp an chhuah ngei ang tih an sawi bawk.

Hetah hian Champhai Sub-Divisional Officer (Sadar), Pu Chandrakant Bagoria leh Champhai BDO Dr. Vanlalnunpuii Ralte te'n thu an sawi a. District Informatics Officer Pu Taj Mohammad leh VC te, YMA leh NGO/CSO te an tel bawk a ni.