1696/2025-2026
Lawngtlai, 2nd October 2025: Vawiin khan Mizoram Premier League (MPL) Season 12 Round - 10 hawnna inkhawm chu CYLA Playground, Chandmary -ah neih a ni a. Dr. Lorrain Lalpekliana Chinzah, Adviser to Chief Minister ( H&FW, A& FW) leh Lawngtlai East bialtu MLA nibawk chuan khuallian niin a hmanpui.
Dr. Lorrain Lalpekliana Chinzah chuan MPL Lawngtlai Organising Committee - te inpekna leh hnathawh fakawm a tih thu sawiin, Mizoram Football Association (MFA) leh Lawngtlai District Football Association (LDFA) inakra thawhhona tha tak awm chu vawn nung zel a pawimawh a ti a. MPL khelh a nih atanga vawiin thlengin mi tam takin eizawnna an hmu tawh tih tarlangin, India ram football inelna sang ber ISL lamah pawh inkhelmi tam zawk an luh theih nan theihtawp chhuah zel a tul hle a ti. Adviser to Chief Minister chuan rilru leh taksa lamah harsatna tawk lo turin infiamna ngaihhlut a tul hle tiin, hriselna ngaipawimawh thar tur leh ruihhlo laka fihlim tlat turin kal khawmte a chah a. MPL Team- tha tak tak zingah MLS FC, Lawngtlai an tel ve chu ropui a tih thu tarlangin, MPL Team tha tak an nih zel a beisei tih a sawi . Lawngtlai East bialtu MLA chuan MPL Season 12 Round- 10 Team zawng zawngte duhsakna hlanin, mawi tak a inkhel tur leh midangte entawn tlak ni zel turin a chah a. Khuallian chuan MPL Lawngtlai Organising Committee - kutah tanpuina sumfai a hlan nghal a ni.
Pu Donny Lalruatsanga, Lawngtlai Bawrhsap leh Chairman, MPL Lawngtlai Organising Committee, nibawk chuan Mizoram Football Association (MFA) leh MPL Organising Board - te chunga lawmthu sawina a nei a. Mizoram sawrkar leh LADC hnuaia Department hrang hrang, LDFA, CYLA, leh Village Council - te inkarah thawhhona tha tak a awm avanga MPL Season 12 Round - 10 khelh theih a nih thu a tarlang a. Nakum lamah pawh Lawngtlaiin hneh taka a thlen leh theih tur thu sawiin, Lawngtlaia MPL Round - nghah a nih leh ngei a beisei thu a tarlang bawk.
Vawiin Mizoram Premier League (MPL) Season 12 Round - 10 hawnna inkhawm hi Pu C. Lalhmachhuana, Hon. Vice President, chuan kaihruaiin, Pu C. Hrangthianga, Co- Chairman, MPL Lawngtlai Organising Committee chuan lawmna thu a sawi a. Pu PC Vanlalhruaia, Sr. Vice President, MFA chuan thutawi sawina nei bawkin, Pu Joseph Lalhmingthanga Chinzah, Honorary Secretary, MPL Lawngtlai Organising Committee- chuan report tawi pekna a nei a. Downtown English School - ten lam an entir bawk a ni.
