832/2025-2026

Saitual, the 11th June, 2025: Vawiin khan AMRUT Mitra 2.0 Scheme hnuaiah Green Mizoram Day 2025 pualin hmeichhiate hminga thingphun “Women For Trees Campaign” neih chhunzawm a ni a, he hun hi Er. Laldinsanga Hnamte, DUDO chuan kaihruaiin Women For Trees Campaign ina a tum te a sawifiah nghal.

He hunah hian Er. Laldinsanga Hnamte, DUDO chuan thu sawiin, Women For Trees Campaign chu sik leh sa danglam chak tak avanga khawlum leh ni sa vawng dai tur thing khawchhunga phun tura Sawrkar laipui ina ruahmanna a siam a ni, a ti a. DUDO chuan he campaign hi India ram puma kalpui a nih thu sawiin, Saitual District-ah pawh UD&PA Department hnuaia Self Help Group nuho te chuan thingphunin, an thingphun theuh te hi an enkawl chhunzawm dawn a ni, a ti. DUDO chuan SHG leh VC te chu an thingphun te enkawl leh venhim kawngah theih tawp chhuah turin a ngen nghal bawk a ni.

Thingphun thawh khatna hi Rulchawm High School tlangah June ni 5, 2025 (World Environment Day) khan neih a ni tawh a, vawiinah hian Green Mizoram Day 2025 pualin a thawh hnihna hi Keifang Centenary Sports Complex-ah neih a ni. SHG member mi 12 te hnenah thingphunna atana an hmanraw mamawh (Field Kit) chu DUDO in a hlan nghal bawk a ni.

Vawiin inkhawmah hian UD&PA Department staff te, SHG nuho te, Keifang Venghlun Village Council leh Keifang Centenary Sports Complex Field Management Committee te an tel a, Er. Laldinsanga Hnamte, DUDO bakah hian Pu KMS Dawngkima, President, Keifang Venghlun VC atang thusawi ngaihthlak a ni.