450/2024-2025

Dated Saitual the 10th May, 2024: Vawiin Chawhma khan Saitual DC Conference hall ah District Level Committee on Green Mizoram, Saitual District chu Dr. Lalngura Tlau, DC saitual kaihhruaina hnuaiah Green Mizoram Day 2024 hman dan tur rel in an thukhawm.

Green Mizoram Day, 2024 hi June ni 11, 2024 ah hian hman tura ruahman a ni a. Kum 2023 a Green Mizoram Day plantation lo neih tawhna Keifang-Tuirini kawngsirah Sawrkar department hrang hrangte hnatlangin thingphunna hun hman leh ni se tia rel a ni a. Hei bakah hian kum 2022 a Green Mizoram Day a thingphun Saitual-Saichal road kawngsir a phun te pawh sam fai a, a kar awlte hnawhkhat tura thingphun leh ni se ti a rel a ni. Saitual District hnuaia NGO hrang hrang hruaitute leh Forest Department te chu lo bawhzui tur a tih an ni bawk.

Kumin 2024 Green Mizoram day ah hian kawng sir cheimawina atan thing parmawi chi te leh nungcha leh sava tlan chi thing te bakah thei kung chite pawh phun ni sela, Forest Department lamin thingtiak phun tur tha an neih theih nan a tul angin hma lo la se tih a ni.

He meeting ah hian sawrkar Department hrang hrang aiawh bakah NGO aiawhte an tel a ni.