449/2024-2025

Aizawl 10th May, 2024: Vawiin chawhma dar 11:00 khan Directorate of Science & Technology, Govt. of Mizoram buatsaihin Innovation Facility Centre Exhibition Hall, MINECO, Aizawl-ah 'National Technology  Day, 2024' hman a ni.

National Technology Day hi May 11 niin, kumin hian remchan zawkna avangin Mizoramah chuan  vawiin May 10 hian a lawmna  hun hi hman a ni.  He hunah hian  Pu Lalmalsawma Pachuau, IRS, Secretary, Planning (Science & Technology) Department, Govt. of Mizoram chu khual lian a ni. Khual lian chuan ram hmasawnna atan  Science thiamna (Technology) hman tangkai a pawimawh a ni tih sawiin, Technology Day hman a ni chu lawmawm a tih thu a sawi a, zirlai kal khawmte  chu tih takzeta technology lama hmasawnna kan neih zel theihna tura tan la turin a fuih.

Kumin National Technology Day thupui chu ‘From School to Startups: Igniting Young Minds to Innovate.’ tih a ni. National Technology  Day 2024 lawmna hi Pu H. Lalsawmliana, Chief Scientific Officer, Directorate of Science & Technology chuan kaihruaiin, National Technology Day  hman a nih chhan te sawifiahin kalkhawmte lawmna hun a hmang a. Pu Edward Lalzuithanga, Scientific Officer chuan Technology Day thupui hrilhfiahna neiin  presentation a pe bawk a ni.

Dr. Aldrin Malsawmtluanga, Scientific Officer chuan Mizoram atanga Patent hmute lawmpuina citation  leh pawisa fai hlanna hun a hmang a, Pu Samuel Lalmalsawma, Principal Scientific Officer, MISTIC-in Innovator-te khawl siam chhuah, a hmangtu turte hnena semna hun a hmang bawk. Kal khawmte hi Pu R.Lalbikzuala, National Innovation Foundation-in thil siam chhuahte entirna leh hrilhfiahna hun a hmang bawk a ni.

He hunah hian Directorate of Science & Technology hnuaia MIRSAC, MISTIC leh Mizoram Science Centre te bakah, Local Innovators te leh Khawl siam chhuah dawngtute  bakah St.Paul’s Higher Secondary School atangin zirlai engemaw zat an tel. Kalhawmte hi tunlai zaithiam lar tak Lahriatrengi (Lilac)-in zaiin a awi a ni. Pu K.Lalrammuana Principal Scientific Officer, DST in lawmthu sawiin hun a khar.

National Technology Day hi kum 1998-a India-in ama kutchhuak technology, khawvel hriata a phochhuahna Ni hriatrengna atana hman thin a ni a. Khatih hunlai khan khawvel hriatah India ram chuan Nuclear siam thei ram a nihzia lantir nan Rajasthan-a Pokran-ah Nuclear hlawhtling takin a enchhin a, 'Trishul' Missile hlawhtling takin a enchhin bawk, Thlawhtheihna - 'Hansa-3' tia an vuah chu he mi ni hian hlawtling takin a thlawhtir bawk a ni. Kum 1999 atang khan kum tin ram hmasawnna atana technology pawimawhna inhrilhhriatna leh inzirtirna hun atan he ni hi hman thin a ni.