2909/2024-2025

Saitual, the 8th November, 2024: Vawiin chawhnu dar 1:00 khan DC Conference Hall, Saitualah Hand Holding Policy (Ban-a-kaih) 2024 hnuaia Thlai Thar Market chungchangah Orientation training chu Saitual district-a Multipurpose farming society chairman leh secretary te tan buatsaih a ni a, District Bawrhsap, DAMC Chairman ni bawk Dr. Lalngura Tlau chu khuallian niin hun a hmanpui.  

He hunah hian Dr. Lalngura Tlau chuan training nei tura kalkhawm zawng zawngte chungah lawmthu a sawi a, he hun hi inzirtirna hun a nih rualin an tawnhriatte sawi zauna hun a ni tel bawk tih sawiin kalkhawmte chu rilru inhawng taka an sawi duhte sawi turin a sawm a ni. Bawrhsap chuan Saitual chu sawhthing intodelhna district an nih angin an vannei hle tih a sawi a, Sawrkar policy thar pawh an hlawkpui ngei a beisei thu a sawi. Secondary Collection Centre chu Saitualah hmun 3-ah- Saitual, Keifang leh Hliappuiah a awm a, Society 44 din tawh zingah 2 chu register a ni tawh tih a sawi bawk. Dr. Lalngura Tlau chuan Society hotute chu rinawmna, dikna leh taimakna hmachhuana theih tawp chhuah zel turin a chah nghal a ni.  

He orientation training hi Pu A. Lalhmachhuana, DAO, DAMC Member Secretary ni bawk chuan a kai hruai a, Pu Zairemkima, DCSO chuan District Agriculture Committee (DAMC) kalphung leh inkahhruaina dante a sawifiah a, Pu SK Das, DCO pawhin Secondary Collection Centre (SCC) inrelbawldan tur chungchang sawizauna leh inzirtirna hun a hmang bawk a ni. Pu Jacob Lalmalsawma, DHO chuan powerpoint presentation hmangin sawhthing leh aieng thliar dan (sorting/ grading of ginger & turmeric) a sawi zauin, Pu Peter Biakthansanga, R.O (soil) pawhin hmunphiah thliar dan (sorting/ grading of hmunphiah) a sawifiah a. “Record keeping & book of Accounts” chungchangah Pu SK Das chuan zirtirna a pe bawk a ni. 

He hunah hian District Bawrhsap Dr. Lalngura Tlau bakah hian PU A. Lalhmachhuana, DAO Pu Zairemkima, DCSO, Pu SK Das, DCO, Pu Laldinsanga, DRDO, Pu Jacob Lalmalsawma, DHO, Pu Peter Biakthansanga, RO, Pi F. Zodingpuii, DIPRO, line department aiawhte leh Saitual district chhunga multipurpose farming society chairman leh secretary te an tel a ni.