2502/2025-2026

Saitual, the 3rd December, 2025: Vawiin khan DC Conference Hall, Saitualah District Bawrhsap, Dr. Lalngura Tlau kaihhruainain International Day of Persons with Disabilities, 2025 pualin hun hman a ni.

He hunah hian Pi Chhuanhlupuii, Addl. DPC & SDEO chuan thu a sawi a, kumin International Day of Persons with Disabilities thupui “Hmasawnna thlen turin harsatna nei te huap telna khawtlang siam” (Fostering disability-inclusive societies for advancing social progress) tih chu a sawi zau a, Mizo khawtlang (society)-ah rorelnaah te enkawl ngai bik naupangte hi ngaihtuah tel an hlawh lo thin hle tih sawiin, hemi kawngah hian ngaihtuahna sen a, tan lak a tul a ni, a ti.

SDEO chuan naupang enkawlna mamawh bik “Children with Special Needs” (CWSN) te tana Samagra Shiksha hmalakna hrang hrang te a tarlang a, CWSN te chu naupang dangte ang bawka zirna an dawn theih nan theih tawpa hma lak thin a ni, a ti. Saitual District-ah hian CWSN 203 ziah luh an ni a, hamthatna chi hrang hrang an mamawh ang zela an dawn thin thu a sawi bawk. SDEO chuan kalkhawmte chu CWSN te chu hmangaihna leh hriatthiamna nen dawm kan a, an tan ngaihtuahna seng a, theih tawp chhuah zel turin a sawm a ni.

Vawiin inkhawm hi District Bawrhsap Dr. Lalngura Tlau chuan a kai hruai a, Pi Chhuanhlupuii, Addl. DPC & SDEO leh Pi Malsawmtluangi, Special Teachers of Handicapped Students aiawh te chuan thu an sawi a, Pi Christina Lalnunfeli, SDC chuan lawmthu sawinain hun a khar a ni. Vawiin hian Saitual District chhunga enkawl bik ngai naupang (CWSN) bakah harsatna nei dang (persons with disability) mi 266 te hnenah thilpek hlan an ni.