2512/2024-2025

Saitual, the 14th October, 2024: Vawiin chawhnu dar 1:00 pm khan Govt. Saitual College Auditorium-ah District Hub for Empowerment of Women (DHEW) leh District Child Protection Unit, WCD Saitual tangkawp buatsaih International Girl Child Day 2024 tawp kharna leh  Saitual district chhunga hmeichhe naupang hlawhtlinna changte lawmman semna hun hman a ni a, District bawrhsap Dr. Lalngura Tlau chu khuallian niin hun a hmanpui.  

He hunah hian khuallian Dr. Lalngura Tlau chuan thu sawiin, Mizo hmeichhiate chuan hma an sawn em em a, harsatna karah pawh an tih tang tang thin avangin hlawhtlinna an chang thin a ni, a ti. Hetih rual hian hmeichhe chunga hleihlenna awm thin lakah hmeichhiate humhim a tul takzet tih a sawi a, chumi tur chuan Saitualah pawh Mission Shakti hnuaia hmalak niin hmeichhe baihvaite tluk luhna tur- Once Stop Centre pawh din a ni tawh tih a sawi. Khuallian chuan naupangte dikna chanvo rahbeha a awm loh nan chuan department hrang hrang te tangruala thawhhona tha tak neih a tul a ni, a ti. 

International Girl Child Day hi kum tin October ni 11-ah lawm thin a ni a, kumin thupui atan hian 'Girls' vision for the future' thlan a ni. Hemi pual hian Saitualah pawh October thla chhung hian activity hrang hrang Aganwadi centre-a PMMVY chungchang awareness neihte, Rashtriya Poshan Maah- Fruit festival te leh financial literacy te buatsaih a ni.  Saitual District chhunga hlawhtlinna chang hmeichhe naupang (Girl achiever) lawmman dawngtute chu- Catherine Malsawmzuali, Lalhluzuali, Lalruatpuii, PC Lalremsiami, PC Lalrinpuii, Vanlalmuanpuii, Vanlalrinmawii Khiangte leh Zodinmawii te an ni.   

Vawiina a kharna inkhawm hi Pi Mary Malsawmkimi, District Mission Coordinator, DHEW in a kai hruai a. Khuallian District bawrhsap Dr. Lalngura Tlau bakah hian Pu James Lalthangmawia, DCPO, Pi Lalramhlui, Gender Specialist (DHEW), Pi Jennifer Zothansangi, Counselor (One Stop Centre) leh Pi PC. Malsawmtluangi, Protection Officer (DCPU) te chuan thu an sawi a ni. Pi Runremsangi, Centre Administrator (One Stop Centre) chuan lawmthu sawinain he hun hi a khar a ni.