2511/2024-2025

Dated Serchhip, the 14^th October, 2024: Vawiin khan Pi Teresy Vanlalhruaii, Secretary, LAD changtu hovin Serchhip DC Pisa Pui Hall-ah Serchhip Town chhunga Village Council te nen an hmalakna chungchanga inkawm hona hun an hmang.

Secretary Pi Teresy Vanlalhruaii chuan VC te fuihna thu sawiin, hna an thawh nachhan leh sum an hmuhna hnarte an hriat chian loh chuan hnathawh that a harsa dawn a, chuvang chuan engkim an hriat ve vek a tul a ni, a ti a. Kum tam tak chhung thingtlang hmasawnna tura tanlak a lo ni tawh thin a. Kum 2021-22 ah Finance Commision in a recommend angin 15th Finance Commission ah kan lut ta a, hmasawnna hna hrang hrang thawh mek zel a ni, a ti a. Swachh Bharat Mission (G) te nena thawhhona tha tak an neih thu Secretary chuan a sawi bawk. VC te chu field level ah tha taka thawhho puiah sawmin, thingtlang khaw tihhmasawn chu an thil tum bulpui a ni tih hria a, khawtlang mipuite hmasawnna atana an sum hmuhte  dik leh fel taka hmang thin turin a chah a. Hnathawhna tur sum an hmuh veleh muangchang lova hma la thuai thin turin a chah bawk a ni.

Hun hmanpuitu Deputy Commissioner Pu Paul L. Khuma pawhin thusawiin Pu Gandhi-a khan thingtlang khua a ngai pawimawh em em a, “Thingtlangin hma a sawn loh chuan hmasawnna famkim a awm thei lo a ni” a tih ang khan kan khawtlang hruaitute pawh rural development lama hmasawnna chak lehzual a thlen theih nan theihtawp a tan la turin a fuih a. Faina leh thianghlimna kawngah tun aia chaka tan la thar turin DC chuan a chah bawk. “Kalphung leh tihdan pangngai chuan a kal mai theih a; amaherawhchu, chu mi piahlama hma sawn lehzual tur chuan tha leh ngaihtuahna sen belh a ngai nasa hle a ni”, DC chuan a ti. VC te mawhphurhna pawimawh zia te, kan khawtlang chawikang tura Pathianin a dah a ni tih te hrechiang turin a chah a. An scheme khawih laite hre chiang a, official te finchhuahtu nih tum turin a chah bawk a ni.

Hun kaihruaitu Dr. C. Vanlalchhanhimi, DLAO chuan inlawmna thu a sawi a. Serchhip District a LAD chanchin leh an hnathawh hrang hrangte a tarlang a, District Park 2- Dawngzawl leh Thenzawl  an enkawl mek thu sawiin, Thenzawl hi PMVK hnuaiah thawm that tuma hmalak mek a nih thu a sawi. Khaw hrang hrangah Gram Sabha hlawhtling taka neih a ni a. Rastriya Gram Swaraj Abhiyan 2024 hnuaiah Panchayat Bhawan sakna tur Hmawngkawn, Chhingchhip leh Chhiahtlang te thlan a ni a, Common Service Centre sakna tur Baktawngah pek a nih bakah khaw hrang hrang 11 ah Computer Set pek an nih thu a sawi bawk.

Vawiin program ah hian sawrkar leh VC te nena thawhhona chungchang te, khawtlang hmasawnna hna an kenkawhna kawnga an hriat duh te leh harsatna an neih chungchangte sawi hona hun hman zui a ni a. Pu V. Lalnuntluanga, e-DPMU Serchhip chuan lawmthu sawiin hun a khar a ni.