1647/2025-2026

Saitual, the 29th September 2025 : Vawiin khan District Hub for Empowerment of Women, WCD buatsaihin DC Conference Hall –ah kum tlinglova inneih khapna dan (The Prohibition of Child Marriage Act 2006) chungchang inhrilhhriatna leh zirchianna neih a ni a, he hunah hian Dr. Lalngura Tlau, Deputy Commissioner chu khuallian niin hun a hmanpui.

Khuallian Dr. Lalngura Tlau chuan kalkhawmte hnenah lawmthu sawiin hun hlawkthlak tak hmang turin a duhsakna a hlan a, kum tling lova inneihna chuan a thalo zawngin nghawng thuk tak a nei tih sawiin, hriselna leh mihring puitlinna kawng tinrengahte, chhungkaw enkawlna kawngahte harsatna lian tak a thlen thin a ni, a ti.

Khuallian chuan ramin ro a neih hlu ber chu mihringte an ni a, rilru leh taksa puitling ngei inneihna chuan ram tana rohlu mi puitling a siam a, nu leh pa puitlingin chhungkaw tha an din mai thin a ni, a ti. Naupangtea inneihna chuan chhungkaw keh darh a siam hma bik a, khawtlang leh ram hmasawnnaah kawngah harsatna a thlen tam lehzual a ni tih a sawi bawk.

Vawiin programme-ah hian Saitual District chhunga Village Council secretary thenkahtte bakah Saitual leh Saitual Chhimveng Kohhran hmeichhiate sawm an nih angin an tel thei a, Pi Mary Malsawmkimi, District Mission Coordiantor (DHEW),WCD chuan kaihhruaiin kalkhawmte lawmna thu a sawi a, Khuallianin thu a sawi zawh hian Pi RK Lalrinsangi, Advocate, DLSA, Aizawl District chuan Prohibition Of Child Marriage Act ,2026 chungchang sawifiahna leh a kaihhnawihte a tarlang a, Dr. Zothanpari Chhakchhuak, SMO, Saitual District chuan nupui pasala inneih hma lutukin taksa leh rilruah nghawng tha lo a neihte inhrilhriatna a nei zui bawk. Kalkhawmte atangin zawhna leh sawihona hun hlawkthlak tak hman niin Pu Ramtharmawia, SFL (DHEW) in kalkhawmte hnenah lawmthu a sawi a, inkhawmna hun hi khar a ni.