2053/2026-2027

Saitual the 3rd September, 2026: Vawiin khan DC Conference Room Saitualah, Mizoram Chief Electoral Officer (CEO), Pi Garima Gupta chuan ERO, AERO leh political party te a kawm a, Special Intensive Revision (SIR) 2026 an kalpui dan te an thlir let.

He hunah hian Chief Electoral Officer (CEO) Pi Garima Gupta chuan thu sawiin, electoral roll-a inthun thar beihpui thlakna Special Intensive Revision (SIR) 2026 chu tluang taka a hmawr an bawk thei chu lawmawm a tih thu a sawi a, chanvo nei zawng zawngte thawhrim rah a ni, a ti.

Pi Garima Gupta chuan SIR 2026 kalpuina kawngah Saitual District chu an che tha hle tih sawiin, sawiselna an dawn loh thu a sawi a, Final Roll tlangzarh tura tha taka inbuatsaih turin kalkhawmte chu a fuih bawk a ni.

Vawiin thutkhawmah hian District Election Officer (DEO) Pu Srinivas Sadi chuan Saitual District-a SIR kalpuina kawnga an hmalakna te chu powerpoint presentation hmangin a sawifiah a, political pary aiawhte pawhin tluang taka a hmawr an bawk thei chu sawrkar chungah lawmthu an sawi a ni. Pi Garima Gupta, CEO hi Pi Ethel Rothangpuii, Jt. CEO chuan a tawiawm a, Pu Srinivas Sadi, District Election Officer, Pi Mary L. Rodinpuii, Election Officer, ERO, AERO te bakah political party te chu he thutkhawmah hian an tel a ni.

8-Chalfilh, 9-Ṭawi leh 21-Lengteng Assembly Constituency Draft Electoral Roll 2026-ah hian voters mipa 26,573 awmin, hmeichhia 27,420 an awm a, a vaiin voters 53,993 an awm a ni. SSR 2025 nena khaikhinin voters 2233 (3.97%) in Draft Electoral Roll 2026-a voters awm zat hi an tlem zawk a, hei hi chhan hrang hrang- pem te, thi te leh roll-a chuang nawn te an paih vang a ni. Electoral Roll siamthat hna hi kalpui zel niin, form thehluhte endikna (hearing) neih zawh a ni tawh a, Final Roll hi September ni 7, 2026 (Thawhtanni) hian tlangzarh a ni ang.