2052/2026-2027

Siaha the 3rd September, 2026: Vawiin khan DC Mini Conference Hall, Siaha-ah District Level Nasha Mukt Bharat Abhiyan (NMBA) Committee chu a Chairman leh District Bawrhsap ni bawk Pu VL Hruaizela Khiangte kaihhruaina hnuaiah thukhawm a ni.

Thutkhawm kaihruaitu District Bawrhsap chuan ruihhlo avangin Siaha District mipui mai bakah Mizoram pum a buai nasa hle tih a sawi a. Sawrkarin ruihhlo dona atana Committee hrang hrang a din thu sawiin, District Level-ah Ruihhlo Do Pawl te, NMBA leh NCORD kaltlangin Police te nen thawhho thin a ni, a ti. Ruihhlo la ti ngai lo ten an tih chhin loh nan leh ti tawh ten an sim theih nan hmalak a nih thu a sawi. Siaha District-a ruihhlo hman sual avanga HIV/AIDS a hluar zel chu veiawm a tih thu sawiin, theihtawp chhuaha tan lak a ngai a ti bawk a. He hmalakna kawngah hian Sawrkar Department te bakah Kohhran, khawtlang hruaitute leh NGO hrang hrangte thawhhona a pawimawh thu sawiin, theihtawp chhuahpui turin a sawm a ni.

Member Secretary leh District Social Welfare Officer ni bawk Pi LS Lalbiakzuali chuan National Action Plan for Drug Demand Reduction (NAPDDR) chungchang sawifiahna a nei a. He Scheme hi Sawrkar Laipuiin 1st April, 2018 atanga a kalpui tan thu te, Ministry of Social Justice & Empowerment chu Nodal Ministry a nih thu leh Mizoramah chuan Social Welfare Department chu Nodal Department a nih thu a sawi. NAPDDR hnuaiah State Level-ah Committee chhawng thum – State Level Steering Committee, District Level Drug Demand Reduction Committee (District Level NMBA Committee) leh Block Level Drug Demand Reduction Committee te awm a ni tih a tarlang a, an mawhphurhna hrang hrangte a sawifiah bawk.

Nodal Officer, District Level NMBA Pi Lalenkawli, SDC chuan kum 2026-2027 chhunga District Level leh Block Level Committee te hmalakna tur Action Plan a pharh a, Ministry of Social Justice & Empowerment ruahmanna zul zuia duan a nih thu sawiin, hmalak dan tur ruahmanna hrang hrangte a sawifiah a ni.

Action Plan chungchang hi kalkhawmte'n sawiho zuiin, District Level leh Block Level-a hmalakna tur atan lungrual taka pawm a ni a, hmalakna tur hrang hrang sawiho nghal a ni.