1818/2025-2026

Saitual, the 9th October, 2025: Vawiin khan DC Conference Room, Saitualah Multi-Shopping Complex Management Committee chu an chairman, District Bawrhsap ni bawk, Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu a sawi a, building chu enkawltu an awm loh chuan a awngrawp mai thin tih sawiin, Multi-Shopping Complex pawh a chul mai loh nan Management Committee chuan an enkawl a, an vil zui zel a tul a ni, a ti.

Bawrhsap chuan Multi-Shopping Complex atanga luah man lo lut te hmangin tih changtlun zel an tum thu a sawi a, quarter tur pawh sak that niin hei hian hnam dang officer in luah tur hmu lo te harsatna a su kiang dawn a ni, a ti.

Multi-Shopping Complex hi DC office building hlui niin, Saitual Hmar Veng-a awm a ni a, tun dinhmunah hian Excise & Narcotics Department, District Hub for Empowerment of Women, One Stop Centre leh Adventure Club ten an luah mek a, floor khat hi quarter anga luah theih tura thawm that niin SDO (S)-in a luah thar bawk a ni. PWD lamin quarter anga luah chin chu assessment an nei ang a, DC office lamin a luah man hi an chawi dawn bawk a ni.

Multi Shopping Complex-a One Stop Centre office luah tura inremna hi September 2025-a a tawp avangin thla khata ₹24,000-a luah chhunzawm dilna an thehlut a, an dilna chu Management Committee te hian a pawm a. Hei bakah hian building thawm that ngai laite thuam tha tura hma lak relin, Multi-shopping complex chu chhawng tin luah luh a nih tawh dawn avangin chowkidar chu chhawr chhunzawm loh an rel bawk a ni.

Vawiin thutkhawm hi Dr. Lalngura Tlau, Chairman, Multi-Shopping Complex Management Committee & DC in a kai hruai a, Multi-Shopping Management Committee member te an tel a ni.