1819/2025-2026

Champhai, dated 9th October 2025: Vawiin khan DC Conference Hall-ah RTI (Right to Information) Week pualin hun hman a ni a, Addl. DC Pu James Lalnithanga chu khuallian a ni.

Khuallian Pu James Lalnithanga chuan RTI hi mipuiin sawrkar department hotu leh staff te a endikna leh enfiahna pawimawh tak a ni a, ram inrelbawlna atana thil tangkai tak niin thatchhiatna te, eirukna te leh thil tha lo hrang hrang a veng thei a ni tih a sawi. Mipuiin an hman thiam a ngai a, sawrkar hnen atanga information an dawn theihna a nih vangin thiam taka an hman a tul thu a sawi a, sawrkar hnathawk te pawhin mipuiin min tihbuai tumnaa ngai lovin thawhpui tumnaa ngai zawkin tha takin dawnsawn ngei a tha tih a sawi bawk. RTI hi thiam taka hman a nih chuan sawrkar hnathawh a sawt zawk ang a, ram pawhin hma a sawn ngei ang tih a rin thu a sawi bawk a ni.

He hun hi District Information & Public Relations Officer Pu Lalzara chuan kaihruaiin RTI chungchang sawifiahna hun PowerPoint presentation hmangin a pe nghal a, RTI thiltum te, a hman theih dan te leh RTI Act hnuaia thil pawimawh hrang hrang a sawi a ni. Presentation zawh hian zawhna leh chhanna hun leh sawihona hun tha tak hman bawk a ni.

He hunah hian department hrang hranga RTI dilna dawngsawngtu, State Public Information Officer (SPIO) leh State Assistant Public Information Officer (SAPIO) te an tel a ni.