1820/2025-2026

Aizawl, the 9^th October 2025: Vawiin khan I&PR Minister thar Pu B.Lalchhanzova chuan a Pisa, MINECO-ah Information Public Relations Printing & Stationery (IPRP&S) Department a Administrative Officer te leh Directorate lama Senior Officer te a ko a. He hunah hian  Sawrkarin I&PR leh Printing & Stationery kalpui a duhdan leh hmachhawp te a sawipui a ni.

Pu B.Lalchhanzova chuan a Department official te chu Department dang te tha taka thawhpui thiam turin a chah hmasa a. A Department hnuaia hmalakna kaihhnawihah Minister in a hriat tur awm chi reng reng te chu thutlukna tha zawk siam a nih theih nan a hnenah thlen vat thin turin a chah bawk a ni.

Sawrkarin mipui tana hna a thawh te,hma a lak mek te, thutlukna a siam te, mipui tana hamthatna a siam ang chi te chu a nih na tur anga mipuiin an chhawr theih nan, mipuiin chiang takin an hriat a ngai tih a sawi a. Notification, schemes, policy leh sawrkar hmalakna puanzar leh zirtirna  kawngah Information & Public Relations (I&PR) hman tangkai leh zual a ngai a ti a. Hemi kawngah hian Department tin ten I&PR kaltlangin Public Relations huanga tan an lak thar a ngai a ni a ti. Sawrkar Department ten Printing & Stationery an hman tangkai dan te pawh ennawn a tul thu a sawi bawk.

Minister hova meeting hmasaberah hian Pi Betsy Zothanpari Sailo, Secretary, IPRP&S in Department hmalakna tlangpui a sawi hmasa a. Hemi hnu hian chipchiar zawkin Pi K.Vanlalsangi, Director, I&PR leh Pu Benjamin Lalzama, Controller, Printing & Stationery ten report an pe bawk a ni.