2693/2024-2025

Saitual, the 25th October, 2024: Vawiin chawhnu dar 1:00 khan DC conference Room Saitualah, District Bawrhsap Dr. Lalngura Tlau kaihhruainain Ministry of Rural Development hnuaia National Level Monitoring (NLM) te chuan ‘Exit meeting’ an nei a, an khaw tlawh report te an pe nghal a ni.

He hunah hian Dr. Lalngura Tlau chuan National Level Monitoring atanga lo kal Pu Shailesh Kumar leh Pu Anil Sharma te chu an thawhrimna avangin lawmthu a sawi a, khaw hrang hrang an tlawhte atanga an thil hmuh leh hriatte inhawng taka sawi turin a fuih a. Bawrhsap chuan an report atanga insiamthat ngaihna laiah te theih tawp an lo chhuah tur thu a sawi bawk a ni. 

NLM te chuan Saitual District an awm chhung hian khaw hrang hrang- Phullen, Thanglailung, Luangpawn, Ngopa, Hliappui, Pawlrang, Buhban, Dilkhan, Lungpher leh Sihfa an tlawh a. Rural development hnuaia scheme hrang hrang- MGNREGA, DAY-NRLM, NSAP, PMAY-G, DDU-GKY, SAGY, PMGSY, PMKSY, SVAMITVA, DILRMP, RSETI leh Panchayat basic verification te chu district-a kalpui a nih dante an endik a, report pawh kimchang tak leh langtlang taka an thehluh thu Pu Anil Sharma chuan a sawi a ni. 

He thutkhawmah hian District Bawrhsap Dr. Lalngura Tlau, Pu Shailesh Kumar, NLM, Pu Anil Sharma NLM, Pu V. Laldinsanga, Project Director, DRDO, Pi Dorothy Muansangi, BDO (Ngopa), Pi Christina Lalnunfeli, SDC, Pi F.Zodingpuii, DIPRO, Pi Helen Zomuanthangi, ARDO, Pu Robert Lalnuntluanga, APO leh Pu K. Lalrintluanga, JE (PWD) te an tel a ni.