1909/2024-2025

Saitual, the 4th September, 2024: Vawiin chawhnu dar 3:00 pm khan Govt. Saitual College Auditorium, Saitualah One Day International Conference on Literature, Cultural Studies, Education and Social Sciences kharna hun hman a ni a, Pu Lallawmawma, Additional Deputy Commissioner, Saitual chu khuallian niin hun a hmanpui.

He hunah hian khuallian chuan International Conference tluang taka zawh fel a ni chu lawmawm a tih thu a sawi a, College zirlai kalkhawmte chu an zirlai tha taka zir turin a fuih. Pu Lallawmawma chuan college zirlai, a bikin final year te chu an hmalam hun thlir a, rilru nei taka lehkha zir turin a fuih a, sawrkar hnain a daih sen loh avangin eizawnna kawng dangte pawh dap tel turin a chah. Khuallian chuan Saitual district chu district thang mek a nih angin eizawnna kawngah pawh hmasawnna hmuh tur a awm zel a, zirlaite pawh he lamah hian rilru seng thiam turin a chah nghal a ni.

Dr. Sarad Chandra Kashyap Asst. Professor, Mid-Western University, Nepal chuan thu sawiin, zirna (education) pawimawhziate a tarlang a. Zirna chuan mi a ti hmasawn a, mihring ngaihtuahna leh chetzia kaihhruai turin a pawimawh tih a sawi. Hei bakah hian gender studies hi  ngaih pawimawh a ngai a, gender vanga inthliarhhranna awm thin chu tiboin, kawng engkimah mipa leh hmeichhiate intluktlanna hi kan ngaihtuah zel a tul tih a sawi.

He International Conference kharna hun hi Pu J. Lalfakzuala, Organizing committee chuan a kai hruai a. Thusawi hi khuallian Pu Lallawmawma leh Dr. Sharad Chandra Kashyap atanga ngaihthlak niin, Pi Liansangpuii Khiangte, Convener, Organizing Committee chuan presentation petute certificate hlanna hun a kai hruai a, a tawp kharna thusawi hi Pi Lalnunthari, Co-Convener, Organizing Committee hnen atanga ngaihthlak a ni bawk. ICLCSESS hi tluang taka zawh fel niin, presentation hi online leh offline-a kalpui a ni a, mi thahnem tak an tel a ni.