450/2025-2026

Saitual, the 5th May, 2025: Vawiin chawhma dar 11:00 khan DC Conference Room, Saitualah District Bawrhsap Dr. Lalngura Tlau kaihhruainain One Stop Centre (OSC), Women Helpline (WHL-181) leh Child Helpline (CHL-1098) kaihhnawiha Saitual District chhunga hmalaknate thlirin thutkhawmna neih a ni.

He hunah hian District Bawrhsap Dr. Lalngura Tlau chuan thu a sawi a, Ministry of Women & Child Development, Govt. of India leh Social Welfare Department, Govt. of Mizoram atanga thupek an dawn angin, Saitual District chhunga One Stop Centre, Women Helpline leh Child Helpline kaihhnawiha hmalaknate report thehluh a ngai a ni, a ti. Bawrhsap chuan kawng hrang hrangah hmalakna te chu kalpui a ni tih a sawi a, chutih rualin hmun kilkhawr ber thlenga an chhawr theih nan helpline number te hi puanzar a, tihlar lehzual a pawimawh a ni, a ti.

Dr. Lalngura Tlau chuan Women helpline leh Child helpline te chu hmeichhia leh naupangte humhimna a nih rualin chawikanna a ni tel tih a sawi a, One Stop Centre chu hmeichhia hleilenna tawk te tluk luh thinna hmun pawimawh tak a ni tih a sawi bawk. Kalkhawmte chu hleilenna laka hmeichhiate leh naupangte an lo him zel theih nan theih tawp chhuah zel turin Bawrhsap hian a ngen a ni.

Vawiin thutkhawmah hian hmalak tawhna hrang hrangte sawiho niin, Saitual Police Station-ah hian District Child Protection Unit hmalaknain Child friendly room dah a ni a, District Hub for Women Empowerment (WCD) te chuan February thla khan One Nation, One Helpline pualin kawng zawh (rally) an nei bawk a ni. Hei bakah hian One Stop Centre te chuan VC, YMA leh MHIP te nen tanghoin inzirtirna leh inhrilhhriatna (awareness) hi theih ang angin an kalpui thin bawk a ni.

Ministry of Women & Child Development, Govt. of India hnen atang District tinah OSC in-charge tur senior officer ruat tura thupek dawn a ni a, Saitual District-ah hian OSC in-charge atan Pu Lalthakima Chhangte SDO (S) ruat niin, a ni hian thla khatah vawi khat chu Dy SP/ASP/CO tawiawmnain OSC hi a endik thin tur a ni. District tina District Magistrate te leh Superintendent of Police te pawhin OSC hi an endik tur a ni bawk.

Vawiin thutkhawmah hian District Bawrhsap Dr. Lalngura Tlau, Pu J. Rokima, Addl. SP, Pu Lalthakima Chhangte, SDO (S), Pu James Lalthangmawia, DCPO, Pu H. Laltanpuia, SDPO, Pi Christina Lalnunfeli, SDC, Pi F. Zodingpuii, DIPRO, Pi Catherine Zarzokimi, Coordinator, CHL, Pi Runremsangi, Centre administrator, OSC, Pi Lalmuanawmi, Supdt, Serenity Boys Home, Lt. VL Chhanchhuahi, Supdt, Hlima In Girls Home, Pu Ramchhuanmawia, VC President leh Pi Lalbiaktluangi, President, MHIP- Sub. Hqrs te an tel a ni.