451/2025-2026

Khawzawl, dated 5th May 2025: Vawiin chawhma dar 10 khan Govt. Chawngtlai Primary School - I chuan an sikulah kum 100 tlin (centenary) lawmna hun an hmang a, Deputy Govt. Chief Whip leh Tuichang bialtu MLA ni bawk Pu W. Chhuanawma chuan khuallian niin he hun hi a hmanpui a ni.

MLA Pu W. Chhuanawma hian Govt. Higher Secondary School, Chawngtlai Class XI tana building sak thar chu a hawng a, tangkai taka an hman theih nan duhsakna a hlan a ni.

Khuallian MLA Pu W. Chhuanawma chuan Govt. Chawngtlai PS - I centenary lawmna hun a hmang chhunzawm a, he hunah hian thu sawiin Govt. Chawngtlai PS - I in kum 100 a tling hi ropui a tiin a lawmpui em em a ni tih a sawi a, hman atang tawha heta zirtirtute lo thawk tawh te leh thawk mek te naupang an zirtirna leh an kaihhruainaah an thawk thain fak an phu hle a ni tih a sawi. Primary sikul zirtirtute naupang an kum a la tlem ber laia zirtirtu an nih vangin an hna hi a pawimawh em em a, khawtlang tan mi pawimawh, naupang tam tak tana kawng sialtu an nih vangin theihtawp chhuaha taima taka thawk turin a fuih a, an seilenna kawngah kawng dik kawhhmuh turin a chah a ni. MLA W. Chhuanawma hian he hun hriatrengna Centenary lungphun a hawng nghal a ni.

He hun hi hun hnihah then a ni a, chawhma hun hi Pu Zorammawia chuan chairman niin hun a kaihruai a, Souvenir Sub-Committee lo din tawh chuan bulletin an tlangzarh bawk a ni. Chawngtlai VC leh DEO Pu J.R. Lalhruaitluanga atangin thusawi ngaihthlak a ni a, sikul naupang te'n special item hrang hrang an nei bawk a ni.

Chawhnu hun hi dar 1-ah tan a ni a, SMC Chairman Pu F. Lalrisanga chuan chairman niin hun a kaihruai a, Khawzawl DC Pu K. Vanlalthiana chu khuallian a ni. Khuallian chuan thu sawiin primary sikul hlun tak hlawhtling takin kum 100 a nihna a lawm thei hi ropui a tih thu a sawi a, khawtlang tana mi hman tlak, eizawnna mumal tak nei tura naupang chher chhuak zel turin a fuih bawk a ni. SDEO lam atang leh sikula lo thawk tawh te hnen atangin thusawi ngaihthlak a ni bawk.

He hunah hian Govt. Chawngtlai PS - I zirlaite leh zirtirtute, hmana lo zir/thawk tawh te leh tuna zir/thawk mek te thanhnem tak an tel a, DEO office a hnathawktute leh Chawngtlaia khawtlang hruaitute an tel bawk a ni.