39/2024-2025

Saitual, the 3rd April, 2025: Vawiin khan DC Conference Room Saitualah, Zawlnghak, Sialkal leh Mawmrang Organic Farmer Producer Company Ltd te leh IVC Agrovet Pvt. Ltd te chuan sawhthing (organic ginger) lei leh hralh chungchangah inremna thuthlung an ziak.

He hun hi District Agricultural Marketing Committee (DAMC) Chairman, District Bawrhsap ni bawk Dr. Lalngura Tlau chuan a kai hruai a, vawiina inremna thuthlung an ziah tur hi sawhthing chingtute tana bung thar a nih a beisei thu a sawi. Dr. Lalngura Tlau chuan thlai chingtuten an thlai thar chhuah hralhna kawngah hlawkna an hmuh zel theih nan department hrang hrang hotute chuan thawhhona tha tak an neih a tul a ni, a ti a, kalkhawmte chu theih tawp chhuah zel turin a fuih bawk a ni.

Vawiinah hian IVC Agrovet Pvt. Ltd te chuan Zawlnghak FPC, Sialkal FPC leh Mawmrang FPC te atangin organic ginger metric ton 1000 chu kg 1-ah ₹30-a leisak turin inremna thuthlung an ziak a, Mizoram Agricultural Marketing Board (MAMB) chuan tanpuina atan ₹20 belh lehin, a belhkhawmin ₹50 in heng FPC te hian an hralh thei dawn a ni. Inremna thuthlungah hian IVC Agrovet Pvt. Ltd aiawh te leh FPC pathuma an Chief Executive Officer (CEO) theuh ten an hming an ziah hnan a, hriatpuitu atan DAMC chairman leh MAMB Deputy Director te pawhin hming an ziah hnan a ni.

He hunah hian Clover Organic Pvt. Ltd lama an hotute pawhin an telpui a, an ni hian FPC te chu an mamawhna zawn hrang hrang documentation leh certification-ah te an pui thin a, thlai chingtute leh thlai lei duhtute thlunzawmtu pawimawh tak an ni bawk. Clover Organic Pvt. Ltd hi MOVCDNER- ina a fund a ni a, Directorate of Agriculture, Govt of Mizoram hnuaia Mission Organic Mizoram (MOM)-ina a kalpui a ni.

Vawiin hun hmannaah hian Dr. Lalngura Tlau, DAMC Chairman & DC, Pi Hmangaihthangi Renthlei, DAO & DAMC Member Secretary, Dr. David Fangzauva, Deputy Director, MAMB, Pu Sanjay Kumar, Sr. Vice President, Clover Organic Pvt. Ltd, Pi Irene Vanhmingliani, Product Sales Officer, Clover Organic Pvt. Ltd, Pi F. Zodingpuii, DIPRO, Pu Lalrawngbawla, CEO, Mawmrang FPC leh Pu Khamchinlala, CEO, Sialkal FPC te an tel a ni.