4347/2024-2025

Saitual, the 19th February, 2025: Vawiin chawhnu dar 2:30 khan Govt. Saitual College Auditorium-ah, Pi Zodinpuii, Asst. Director, KVIC, Aizawl kaihruainain District Level Awareness Camp on Prime Minister's Employment Generation Programme (PMEGP) neih a ni a, he hunah hian District Bawhrsap, Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan thu sawiin, PMEGP chu thalai eizawng mek te leh mahni intodelh tum te tana scheme tha leh pawimawh tak a ni, a ti a. Bawrhsap chuan thalaite chu sawrkar hnain a daih dawn loh avangin ei zawnna kawng dang dap tel a tul tih sawiin, he scheme hmang hian mi tam tak te pawh ei zawnna kawngah an lo hlawhtling tawh a ni, a ti. Dr. Lalngura Tlau chuan mi hlawhtling tak te pawh an bul tana chu te leh ho tak a ni thin tih a sawi a, zirlai kalkhawmte chu chhel taka awm tur leh nu leh pate chawm hlawm niloa mahni intodelh thei turin a fuih a ni. Zirlai naupangte chu awareness camp-a thusawite chu ngun taka ngaithla a, hlawkna chhar ngei turin Bawrhsap chuan a chah nghal a ni.

Pi Zodinpuii, Asst. Director, KVIC, Aizawl chuan PMEGP sawizauna leh he Scheme hnuaia inkaihhruaina awm te chu Powerpoint Presentation hmangin zirtirna a pe a. PMEGP chu India Sawrkar laipuiin ram chhung mite kutkawih thiamna hmanga eizawnna tha an neiha, ram chhungah hna thawh tur tam zawk a awm theih nana Scheme duan a nih thu a tarlang bawk.

Pu Robert Zosangliana, Lead District Manager, Saitual District pawhin thu sawiin, PMEGP hnuaia Bank ten Loan an pekchhuah dante a sawi zau a. He Awareness Camp-ah hian PMEGP Beneficiaries-te hnen atangin PMEGP atanga an hlawhtlinna chanchinte ngaihthlak a ni bawk.

Saitual District mipuiten  PMEGP Loan an dil dawnin Project Director hi DCIO a nih angin DRDO office ah PMEGP chungchang ngaihven theih a ni a, online portal-a dil ten KVIC/KVIB/DIC thlan tur zingah DIC thlan mai thin tur a ni.

PMEGP District Level Awareness Camp hi Pi Zodinpuii, Asst. Director, KVIC, Aizawl  chuan a kai hruai a, District Bawhrsap, Dr. Lalngura Tlau chu khuallian a ni. Pu Robert Zosangliana, Lead District Manager, Saitual District, Pu John Tualzamang, Vice Principal, GSC, Pu PC Lallawmkima, RAO, DRDO, Pi Helen Zomuanthangi, ARDO, DRDO, Pi F. Zodingpuii DIPRO bakah Govt. Saitual College zirlai naupangte an tel a ni.