1653/2026-2027

Dated Saitual the 5th August, 2026: Kumin Independence Day denchhena Saitual District Football Association (SADFA) huaihawt Prof. Lalnilawma MLA Trophy Saitual District & 9 Ṭawi AC Inter Village Football Tournament 2026 neih tur chu nizan khan Keifang Venghlun YMA Zawlbukah khuallian, Minister of State, Ṭawi bialtu MLA ni bawk, Prof. Lalnilawma'n a pet hawng.

Khuallian Minister Prof. Lalnilawma chuan thalaite tan Inter Village Football tournament huaihawt a ni thei chu lawmawm a tih thu a sawi a, SADFA hruaitute inpekna chu a fakawm a tih thu a sawi. Football Association tel lo chuan tournament buatsaih theih a nih loh thu a sawi a, thalaite tana an hmalakna chuan rah tha zawk a thlen ngei a beisei thu a sawi bawk. Minister chuan Saitual District chhunga infiammite tan infiamna hmanrua (sports infrastructure) tihchangtlun kawngah hma lak chhoh zel a ni, a ti a, Mizoram aiawh mai ni lo, India ram aiawh thlenga infiammite chher chhuah an ni theih nan theih tawp chhuah zel turin kalkhawmte chu a chah a ni.

Khuallian chuan football chu infiamnaah chuan ngaihhlut hlawh ber a nih thu leh a inkhel te bakah a entute tan pawh a hlimawm tih a sawi a, Inter Village Football Tournament chu kum dangah pawh buatsaih chhunzawm zel an tum thu a sawi bawk. Infiamna hrang hrang ti thinte chuan thian tha siam nan an hman thin angin inkhel turte pawh inpawh tlan nana hman tum turin a chah a, ruihhlo leh infiamna chu a kal kawp thei lo tih hre reng turin inkhel turte chu a chah nghal a ni. Tournament tluang tak leh hlawhtling taka hman a nih theih nan inkhel tur leh mawhphurhna hrang hrang nei zawng zawng te a duhsakna a hlan a ni.

Hun hmannaah hian SADFA President Pu Lalbiakvela Royte in inlawmna thu a sawi a, hunserh hi SADFA Executive Member Pu Lalbiakthanga’n a hmang a, SADFA Honorary Secretary Pu Lalmuanpuia Hmar in report pein, SADFA din tirh atanga chhinchiah tlak tak tak an neih te powerpoint presentation hmangin a tarlang. Saitual District VC Association President Pu J. Thangzuala chuan thu sawiin, Pu Zothanpuia, Professional Footballer, Mumbai FC (ISL) kaihruainain thutiam (oath taking)  neih a ni a, SADFA treasurer Pu H. Lalhmunliana chuan lawmthu sawiin hun a khar a ni.

He tournament hi August ni 5 atangin Keifang Centenary Sports Complex-a khelh tan tur a ni a, team 19 an tel ang a, chungte chu- Keifang Venghlun, Maite, Rulchawm, Lenchim, Keifang Leitan, Ruallung, Ṭawizo, Tualbung, Saitual Venglai, Hliappui, Saichal, Khanpui, Saitual VC-I, Thingsulthliah VC-I, Saitual VC-III, Keifang Venglai, Phullen, Seling leh Sihfa te an ni.