1857/2025-2026

Saitual, the 10th October, 2025 : Vawiin khan Rural Development Department leh SELCO foundation te hmalaknain RD Minister Prof. Lalnilawma chuan DRDO Conference Hall, Saitualah loneitu 21 hnenah solar powered sprayer a hlan.

He hunah hian khuallian Minister Prof. Lalnilawma chuan thu sawiin, SELCO foundation hruaitute chu an hmalaknaah te fakawm a tih thu a sawi a, loneitute tana tangkai tak solar powered sprayer an hlan thei chu lawmawm a tih thu a sawi.

RD Minister chuan sawrkarin kuthnathawktute tan SELCO foundation leh MzSRLM te nen thawkhoin hma an la chho zel tih a sawi a, Self-Help Group te tan solar hmanga sawhthing hem rona te pawh an buaipui mek thu a sawi a. Hei bakah hian hmalakna dang hrang hrang bazar shed-a solar light dah te, solar cold storage siam te leh solar hmanga tui pump-na siam te an la bak a ni, a ti.

Minister chuan tunlai khawvel boruak chhe mekah solar energy hman hi India sawrkar pawhin a ngai pawimawh hle tih a sawi a, SELCO foundation chu a sulsutu an ni tih sawiin, sawrkar nen pawh theih tawp chhuah zel an tum a ni, a ti.

Vawiin inkhawmah hian Pu Lalnuntluanga Colney, State lead, SELCO foundation pawhin thu a sawi a, SELCO foundation chungchang sawizauna neiin, Saitual District-a an hmalakna hrang hrang te a tarlang a, hma lak chhoh zel an tum thu a sawi bawk.

SELCO Foundation hian kum 2023 January thla khan Mizoramah bul rawn tanin, hmathlir lian tak a nei a chungte chu -Mizorama eizawnna lama harsatna awmte sutkian nan Renewable Energy (Solar) hmangin Livelihood Sector hrang hrang te- Lo neih, ran vulh leh sumdawnna tenaute tih hmasawn a ni. SELCO Foundation hian Mizoram district zawng zawngah nasa takin hma a la mek a ni.

Vawiin solar powered sprayer hlanna inkhawm hi Pu V. Laldinsanga, Project Director, DRDO chuan a kai hruai a, khuallian RD Minister Prof. Lalnilawma leh Pu Lalnuntluanga Colney, State lead, SELCO foundation in thu an sawi a ni. Vawiin inkhawmah hian Saitual Bawrhsap Dr. Lalngura Tlau, Pu Lalzuala Sailo, SDO, PHED, Pi F. Zodingpuii, DIPRO te, VC member te leh loneitute an tel a ni.