3626/2023-2024

Saitual 2nd February, 2024 : Vawiin Chawhma khan Saitual DC Conference Room ah Rashtriya Gram Swaraj Abhiyan (RGSA) sensitization meeting chu, Chairman Dr Lalngura Tlau, Saitual DC kaihhruaina hnuaiah neih a ni.

Vawiin thuthkhawmna a Chairman, Dr Lalngura Tlau Saitual Bawrhsap ni bawk chuan Rashtriya Gram Swaraj Abhiyan chiang zawk a hmelhriat na an nei thei tur chu lawmawm a tih thu sawiin, Village Council te tihchakna kawnga he scheme pawimawhzia sawiin, RGSA scheme hnuaia Saitual District a hmalakna hmuh chhoh zel a ni chu a lawmawm hle a ni, a ti.

Dr Lalngura Tlau chuan kalkhawm thenkhat te chuan RGSA chu an la hmelhriat lutuk lo maithei a, amaherawhchu Saitual District chhunga thingtlang khaw hrang hrang te hmasawnna thlen tu tur tangkai tak a nih avangin thawhhona tha an neih a pawimawh takzet a ni, a ti.

Vawiin thuthkhawmna huaihawt tu Local Administration Department aiawh in Pi Dorothy Muansangi , District Local Administration Officer, Saitual chuan RGSA chungchang leh an hmalakna hrang hrang te sawina hun a hmang a.

RGSA chu Ministry of Panchayat hnuaia scheme niin, VC te tha tih chak leh hmasawnna ruhrel- infrastructure siam te, VC te chu Sawrkar ah innghat tawp mai lova anmahni a intodelhna hmanrua - own source an neih theih nana hmalakpui te, Self help Group te tha tihchak te a huam vek thu a sawi a, India sawrkar in a UN Sustainable Development Goal 17 te ti hlawhtling tura a beih mek na kawngah hmanrua pawimawh tak a ni, a ti. RGSA chuan component hrang hrang a kalpui thu pawh sawiin, infrastructure development te, Distance learning component te leh Training components ah te pawh hmalakna kalpui chhoh mek zel a ni, a ti. Saitual District ah pawh RGSA hi kalpui a ni mek zel a ni, a ti a; RGSA scheme atang in VC House 16 sak a ni tawh a, Computer set hi VC 25 ah sem tawh niin Common Service Center hi Ngopa ah din a ni tawh bawk a ni, a ti.

Pi Brenda Laldampuii, District Programme Manager, Saitual chuan RGSA lo chhuah dan leh a chanchin tlangpui PowerPoint presentation a pe a, Mizoram leh Saitual District bik a an hmalak tawhna te a tarlang bawk a ni. Report te ngaihthlak a nih hnu hian kalkhawmte zawhna leh chhanna hun pawh hman a ni bawk a, Line Department hrang hrang aiawhte anmahni zawn theuh a hma an lo lak ve theih dan tur te pawh sawiho a ni.

Rashtriya Gram Swaraj Abhiyan hi Ministry of Panchayati Raj hnuaia Centrally Sponsored scheme a ni a, India rama Panchayat te tha tihchak leh hmasawnna ruhrel siamsak na kawnga pawimawh tak a ni. Mizoram ah pawh RGSA hnuaiah hian hmalakna kalpui a ni mek zel a, Report a a lan danin hmalakna tamtak zingah a langsar zual te chu nikum 2023, December thla thleng khan Panchayat Bhawan 150 sak a ni tawh a, Common Service Centre hi 15 ah sak a ni tawh bawk. Intodelhna lam project pawh kalpui zel niin, Areca Leaf plate Production Centre chu Bilkhawthlir ah Cheng Nuai 49 hmanga sak niin, Rural Homestay & Agri Tourism project chu cheng Nuai 84 sengin Tuipui D ah sak zawh tawh a ni a, Handloom Design Training cum Production Centre, Thenzawl a Cheng Nuai 141.23 seng a sak pawh hawn a ni tawh bawk a ni.

Vawiin a RGSA sensitization meeting ahhian Saitual District a RGSA line Department aiawhte te thahnem tak an tel a ni.