3627/2023-2024

Dated Aizawl the 2nd February, 2024: Vawiin khan CM Meeting Hall-ah Chief Minister Pu Lalduhoma kaihhruaiin Pradhan Mantri Gram Sodak Yojana (PMGSY) hnathawhte thlirletna (review) meeting neih a ni a. Pu Vanlalhlana, Minister, PWD, Pu TBC Lalvenchhunga, Adviser to CM leh PWD officials pawimawhte an tel.

He hunah hian Chief Minister chuan, sawrkar thar kan neih hmaa PMGSY hmalakna vawiin thlenga la thawh, a huna zawh hman loh tur nia lang te chu chak taka thawhtir turin a chah a. Sawrkar thar kan neih hnua hnathawhte phei chu a hun taka zawh ngei kan tum tur a ni, tiin department officials te a hrilh a ni.

PMGSY Version 1 hmangin kawngpui 345, kilometers 4288 a thui sial a ni a, an zinga 43 hi la zawh fel loh a ni. Version 2 hmangin kawngpui 6, kilometers 194 a thui pavement leh repairing thawh a ni a, panga hi la zawh fel loh a ni. Tunah hian version 3 a lo chhuak leh tawh a, upgradation leh improvement hmun 17 a thawhna tur a ni ang.