4628/2024-2025
Saitual, the 12th March 2025: Vawiin chhun dar 12 khan Saitual Town Sanitation Committee chu DC Conference Hall, Saitualah Committee Chairman Dr Lalngura Tlau leh District Bawrhsap ni bawk kaihhruainain neih a ni a, he hunah hian faina kawnga hmalak tawh dante thlirletna neih niin hmalak zui zel dan tur sawiho a ni.
Chairman Dr Lalngura Tlau chuan kalkhawmte hnenah thu sawiin district level/town levelah khawpui fai ber nihna chu chhawm nung zel turin a chah a, chutih rualin, faina chungchangah lawmman lak reng theih a nilova, mihring chengte fai rengna chu a pawimawh ber zawk a ni, a ti. Bawrhsap chuan faina chuan hriselna kawng a hril thui hle a ni tih a sawi a, mihring dam reina thlengin a nghawng a ni, a ti. Dr. Lalngura Tlau chuan faina kawnga VC area tina sanitation committee-te hmalakna chu fakawm a tih thu a sawi a, hunpui hrang hrang denchhena faina hapta neih zel tur a ni a tih sawiin, chu chuan kumtluana fai rengna a keng tel dawn a ni, a ti.
Pu Er.Laldinsanga, DUDO & Member Secretary pawhin lawmthu sawiin district/town fai inelna (swach surveksa)a intihsiakna lawmman an lak chhan chu khawtlang mipuite leh saitual town sanitation committee-te thawhrimna vang liau liau a ni,a ti a. Intihsiakna (parameters) hrang hranga hmalak tawhnate sawifiahna leh hmalak tharna tur kawng hrang hrangte a sawi bawk.
Vawiin thutkhawmah hian 2024 cleanliness competition thlirletna te, Swachh Survekshan 2024 (India ram khawpui fai inelna) inbuatsaih chungchanga hmalak ho dan turah VC area tina faina beihpui thlak dan turte, zirna inte leh sawrkar office leh vantlang hmunhma hrang hranga hnatlangpui koh leh endik zui dan turte, Garbage truck lian tlan dan siam rem leh tlan belh tir chungchangte, user fee/garbage collection fee en ṭhat leh ennawn chungchangte an rel a ni. Heng bakah hian meeting-a kalkhawmten faina chungchanga an vei leh hmasawnna tur atana rawtna hrang hrang an neihte an sawiho bawk. Fai lawmman dawn atangin VC area tin hman tur bawllhlawh bawm tawih thei leh tawih theilo thliar hranna pahnih theuh hlan an ni a, fai lawmman dawnte chu fai leh zelna atana hman tur a nih thu ngaihthlak a ni bawk.
Vawiin thutkhawmah hian Dr. Lalngura Tlau, Deputy Commisssioner, Er. Laldinsanga, DUDO & Member secretary leh committee member atangin sawrkar department hrang hrang aiawh leh NGO aiawhte an tel thei a ni.
