2282/2025-2026

Saitual, the 18th November, 2025: Vawiin khan DC Conference room, Saitualah Pu Lallawmawma, Addl. DC kaihhruainain Sardar@150 inpumkhatna kawng zawh (Unity March) neih dan tur relin thutkhawmna neih a ni.

He hunah hian Pu Lallawmawma, Addl. DC chuan thu a sawi a, Sardar@150 chu India ram inpumkhatna atana hma latu pawimawh tak, Sardar Vallabhbhai Patel pian champha kum 150-na puala Mera Yuva Bharat (MY Bharat) hnuaia India ram inpumkhatna atana beihpui thlakna tur a nih thu sawiin, hemi pual hian programme hrang hrang kalpui a nih tur thu a sawi bawk.

Vawiin thutkhawmah hian sawrkar laipui aṭanga ruahmanna awm sa, November ni 25, 2025 aia tlai lovah "Inpumkhatna kawng zawh (Unity March)" buatsaih tura tih a nih angin, Saitualah pawh Unity March hi buatsaih ni se tih rel a ni a. November ni 21, 2025 (Zirtawp ni) chawhnu dar 1:30 pm -ah Lungdawh kawn atang kawng zawh tan tur niin, a tawp kharna inkhawm hi Saitual Public Playground-ah neih tur a ni ang.

Unity March-ah Govt. Higher Secondary School, Saitual zirlai naupangte chuan kawng an zawh ang a, Govt. Middle School-II, Saitual atang hnam lam entir a ni bawk ang.