3352/2024-2025

Saitual, the 4th December 2024 : Vawiin chawhma dar 11:00 khan DC Conference Room Saitualah, District Bawrhsap Dr. Lalngura Tlau kaihhruainain department hrang hrang hotute chu sawrkar hnathawkte chenna tura sawrkar ruahmanna “General Pool Accommodation” chungchang ngaihtuahin an thukhawm a.

He hunah hian Dr. Lalngura Tlau chuan kalkhawmte hnenah lawmthu sawiin Aizawl pawna Sawrkar hnathawk ten chenna tur chungchangah harsatna an tawk thin tih a sawi a, he harsatna su kiang tur hian Mizoram sawrkar chuan ruahmanna tha tak a nei a ni, a ti. Bawrhsap chuan mihring kan pun zel rualin ram pawh a indaih lo telh telh a, chuvangin hmun zimtea mihring chen tam theih dan tur ngaihtuah chu thil tul tak a ni tih a sawi. Bawrhsap chuan sawrkar ruahman General Pool Accommodation hmang hian sawrkar ramah quarter sak a ni ang a, sawrkar hnathawk chenna tur nei lo ten harsatna an tawh thin chu hei hian a su kiang dawn a ni, a ti.

Vawiin thutkhawmah hian Saitual district chhunga department hrang hrang hotute leh aiawh kalkhawmte hnen atangin staff leh quarters an neih dante ngaihthlak a ni a. Department tin ten staff, quarters leh ram an neih dante chu December ni 6 (Zirtawpni) 2024 hmain DC Office ah thehluh vek tura rel a ni a, he form hi  General Administration Department (GAD) ah ni 16 December hmain thehluh leh tur a ni ang. He thutkhawmah hian Saitual District chhunga Sawrkar Department hrang hrang hotute leh an aiawhte an tel a ni.