3351/2024-2025

Aizawl, the 4^th December 2024 : Health Minister Pi Lalrinpuii'n vawiin khan Mizoram State Cancer Institute (MSCI) Zembawk ah MSCI ah ngei cancer damlote tan inzai theihna ‘Surgical Services’ bultanna Operation Theatres Complex leh hemi ina a ken tel damlo 7 dah theihna ICU-te a hawng.

Heng hawnna programme tawite MSCI Conference Hall-a neihah thu sawiin Health Minister Pi Lalrinpuii chuan MSCI ah inzai theihna surgery services leh ICU hawn a ni ta chu lawmawm a tiin mipui harsa zawk tam tak, phai panna tur neilo ten nasa takin an chhawr tangkai thei dawn a, chu mai bakah Aizawl Civil Hopsital leh ZMC ah inzai ngai tam tak te chu hetah an inzai thei dawn tawh a, hemi vang hian heng damdawiin lian 2 kan neih te hi a chhawk zangkhai thei dawn a ni, a ti. MSCI ah Surgery Services hawn thei anih dan tlangpui te sawiin Minister chuan Sawrkarin hei hi a ngaipawimawh hle a, mut mawh hnar mawh a neiin, cancer zai thei doctor MSCI a thawkte puibawm theitu nurse leh thawktu dangte dah belh a ni a, mahse hengte hi a tlem thei ang ber ‘bare minimum’ chauh a ni chungin Surgery Team hi din ani a, vawiin kan hawng thei hi MSCI leh Mizoram hriselna dinhmun tihchangtlunna mellung pawimawh tak a ni, a ti.

Health Minister chuan Mizoram a hriselna ruhrel leh ruangam neih dan chungchang sawiin PHC ah te damlo admit an tlem hle a, a mahse District Hospital te erawh mipuiin kan bawr hle thung a, chuvangin rural health lamah chuan kan tha thawhkhat a mahse tertiary sector lam, specialist sector lamah thung chuan doctor leh tunlai hmanraw changkang lamah kan pachhe leh viau thung si. Chuvangin District Hospital leh kan damdawiin lian te hi tihchangtlun zel leh thuam that chu Sawrkarin a ngaipawimawh hle a ti a. ZMC a IVF te, lung zaina Cardiothoracic Surgery te, thluak zaina Neurosurgery te tan anih theih nan kawng te dap mek anih thu Minister hian a sawi lang a. Health Services tihchangtlun nan CSR te hi hman tangkai leh dap zel a pawimawh tih sawiin Company tam tak ten Health Sector atan an thawk chak thin a, hengte hi kan dap zel a tul khawp mai, a ti bawk.

Programme tawite hi Dr. Lalhmingmawii, Director, MSCI in kaihruaiin Dr. Jeremy L Pautu, Medical Superintendent chuan report tawi a pe a. MSCI ah Director lo ni tawh doctor pension 3 te bakah senior doctor engemaw zat an tel bawk a ni.

MSCI ah hian cancer zai thei doctor pathum (gynane onco surgeon, onco surgeon superspecialist leh head and neck onco surgeon) an awm awm tawh a, an mahni puitu anesthesiologist leh thawktu dang dah belhin surgery services hi tan a ni a, hemi in a mamawh leh keng tel ICU khum 7 awmna pawh hawng nghal a ni. Operation Theatres Complex hnuaiah hian Major OT 2 leh Minor OT 1 a awm a. Hengte hi Sawrkar Laipui Scheme ‘Tertiary Cancer Care Centre’ scheme hnuaia din leh sak a ni.

MSCI ah hian tun dinhmun ah doctor 16 an thawk mek a, chung zing 13 chu nghet niin 3 chu contractual NHM hnuai ami te an ni.